ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រ​កម្ពុជា នៅ​ថ្ងៃ​ទី២៤ ខែសីហា ឆ្នាំ២០២៣ បានសម្រេចបង្កើតក្រុមអ្នកនាំពាក្យរបស់នាយករដ្ឋមន្ត្រី ចំណុះ​ខុទ្ទកាល័យ​នាយករដ្ឋមន្ត្រី ដើម្បីធ្វើជាសេនាធិការលើកិច្ចការព័ត៌មានរបស់នាយករដ្ឋមន្ត្រី។

រាជរដ្ឋាភិបាលនីតិកាលទី៧បានចាត់តាំងឯកឧត្តម មាស សុភ័ណ្ឌ ជាប្រធាន​ក្រុម​អ្នក​នាំពាក្យ​របស់​នាយករដ្ឋមន្ត្រី។ ការតែងតាំង និងការផ្លាស់ប្តូរ​សមាសភាព នៃ​ក្រុម​អ្នក​នាំ​ពាក្យ​របស់​នាយក​រដ្ឋ​មន្ត្រី ត្រូវធ្វើឡើងតាម ការសម្រេចរបស់នាយករដ្ឋមន្ត្រី ដោយ​យោង​តាម​សំណើ​របស់​ប្រធាន​ក្រុម​អ្នក​នាំពាក្យ។ ក្រុមអ្នកនាំពាក្យរបស់នាយករដ្ឋមន្ត្រី អាចបង្កើត​ក្រុម​ការងារ​ចំណុះ​តាម​ការ​ចាំបាច់ តាមការសម្រេចរបស់នាយករដ្ឋមន្ត្រី ដោយយោង​តាម​សំណើ​របស់​ប្រធាន​ក្រុម​អ្នក​នាំពាក្យ ដើម្បីអនុវត្តភារកិច្ចរបស់ខ្លួន។

យោងតាមសេចក្តីសម្រេចដែលបានធ្វើឡើងនៅថ្ងៃទី ២៤ ខែសីហា ឆ្នាំ២០២៣ ក្រុម​អ្នក​នាំ​ពាក្យ​របស់​នាយករដ្ឋមន្ត្រីមានភារកិច្ចដូចជា សម្របសម្រួលព័ត៌មានផ្ទាល់ខ្លួនរបស់នាយករដ្ឋមន្តី។ ទំនាក់​ទំនងជាមួយបណ្តាញសារព័ត៌មានជាតិ និងអន្តរជាតិ​ សម្រាប់​ព័ត៌មាន​ពាក់ព័ន្ធ​នឹង​នាយក​រដ្ឋ​មន្ត្រី​។ ទំនាក់ទំនងជាមួយបណ្តាស្ថាប័ន និងអង្គភាព​នានា​ សម្រាប់​ព័ត៌មាន​ពាក់ព័ន្ធ​នឹង​នាយក​រដ្ឋ​មន្ត្រី។ ស្រាវជ្រាវ និងប្រមូលចងក្រងរាល់ព័ត៌មានដែលពាក់ព័ន្ធនឹងនាយករដ្ឋមន្ត្រី។ រៀប​ចំ​សេចក្តី​បំភ្លឺ សេចក្តីប្រកាសព័ត៌មាន សេចក្ដីថ្លែងការណ៍ និងការផ្សព្វ​ផ្សាយ​ផ្សេង​ទៀត​អំពី​ព័ត៌មាន​របស់​នាយករដ្ឋមន្ត្រីឱ្យបានទាន់ពេល និងមានប្រសិទ្ធភាពខ្ពស់ និងបំពេញភារកិច្ចផ្សេងទៀត តាម​ការ​ប្រគល់ពីនាយករដ្ឋមន្ត្រី៕ អត្ថបទ ៖ ប្រាក់ វ៉ាន់ដា