បណ្តាសហព័ន្ធ និងសមាគមន៍នានាក្នុងវិស័យទេសចរណ៍ បង្ហាញក្តីរំពឹងថា ការបង្កើនផែនការសកម្មភាពជាយុទ្ធសាស្ត្រថ្មីៗបន្ថែមទៀត របស់រដ្ឋមន្ត្រីអាណត្តិថ្មី នៃក្រសួងទេសចរណ៍ បានប្រកាសដាក់ចេញ ដើម្បីអនុវត្តនោះ នឹងជំរុញការអភិវឌ្ឍន៍វិស័យទេសចរណ៍ ជំរុញកំណើនទេសចរ និងអ្នកវិនិយោគទុនជាតិអន្តរជាតិ និងជំរុញកំណើនសេដ្ឋកិច្ចជាតិ និងប្រជាជនបានល្អប្រសើរ។
បើតាមលោក លូ ម៉េង ប្រធានសហភាព សហព័ន្ធទេសចរណ៍កម្ពុជា និងតំណាងសមាគមន៍សណ្ឋាគារកម្ពុជា បានថ្លែងប្រាប់BTV នៅយប់ថ្ងៃទី២៥ ខែសីហានេះថា រដ្ឋមន្ត្រីក្រសួងទេសចរណ៍នៅក្នុងរាជរដ្ឋាភិបាលអាណត្តិទី៧នេះ គឺបានប្រកាសបន្តអនុវត្តគោលនយោបាយដែលជាផែនការយុទ្ធសាស្ត្រសំខាន់ៗក្នុងការអភិវឌ្ឍន៍វិស័យ ទេសចរណ៍ ពីអាណត្តិទី៦ ហើយឯកឧត្តម ក៏បានរៀបចំផែនការយុទ្ធសាស្ត្រថ្មីៗបន្ថែម និងរៀបចំចង្កោមការងារជាច្រើនបន្ថែមទៀតជាច្រើន ព្រមទាំងអំពាវនាវឲ្យភាគីពាក់ព័ន្ធទាំងអស់ចូលរួមអនុវត្តដើម្បីប្រែកា្លយកម្ពុជា ជាគោលដៅទេសចរណ៍សកល មានភាពទាក់ទាញ ហើយយើងក៏រំពឹងថា អាជីវកម្មក្នុងវិស័យទេសចរណ៍ ជីវភាពពលរដ្ឋដែលអាស្រ័យផលពីវិស័យទេសចរណ៍ ក៏នឹងមានការរីកចំរើន។
ដោយឡែកបើតាម លោក អាណូដាត ប្រធានសមាគភោជនីយដ្ឋានកម្ពុជា ថ្លែងថា អស់រយៈពេលច្រើនមកនេះ សមាគមភោជនីយដ្ឋានកម្ពុជាបានធ្វើការងារជាយុទ្ធសាស្ត្រល្អៗជាច្រើនជាក្រសួងទេសចរណ៍ ហើយយើងនឹងបន្តបង្កើនកិច្ចសហការធ្វើការ និងគាំទ្រខ្ពស់ផែនការយុទ្ធសាស្ត្រថ្មីៗរបស់រដ្ឋមន្ត្រីអាណត្តិថ្មី ដើម្បីធ្វើឲ្យកម្ពុជា ក្លាយជាគោលដៅទេសចរណ៍មួយល្អជាងគេ ហើយរំពឹងថា ក្រសួងនឹងសម្រេចគោលដៅចក្ខុវិស័យទំាងនេះ។
នៅក្នុងពិធីសំណេះសំណាលជាមួយមន្ត្រីរាជការនៃក្រសួងទេសចរណ៍នៅថ្ងៃម្សិលមិញនេះ ឯកឧត្តម សុខ សូកេន បានថ្លែងថា ដើម្បីជំរុញការអភិវឌ្ឍន៍វិស័យទេសចរណ៍កម្ពុជា មានភាពទាក់ទាញ ក្រសួងទេសចរណ៍បានរៀបចំបង្កើនយុទ្ធសាស្ត្រ ចំនួន៥ទៀតរួមមាន៖ ១.បង្កើនប្រសិទ្ធភាព នៃការគ្រប់គ្រងកិត្តិនាមកម្ពុជា ២.បង្កើនប្រសិទ្ធភាព នៃការផ្សព្វផ្សាយភាពទាក់ទាញទេសចរណ៍កម្ពុជាទៅកាន់ទីផ្សារសំខាន់ៗ ៣.បង្កើនប្រសិទ្ធភាព គ្រប់គ្រង និងសម្របសម្រួលកិច្ចការផ្ទៃក្នុងពាក់ព័ន្ធនឹងការធ្វើដំណើររបស់ទេសចរ រួមទាំងការអភិវឌ្ឍន៍ហេដ្ឋារចនាសម្ព័ន្ធរឹង និងទន់ ៤. បង្កើនប្រសិទ្ធភាពអភិវឌ្ឍន៍ផលិតផលទេសចរណ៍ និងទី៥. បង្កើនប្រសិទ្ធភាព អភិវឌ្ឍធនធាន និងគោលដៅទាក់ទាញទេសចរណ៍ប្រកបដោយភាពប្រកួតប្រជែងខ្ពស់ និងបង្កើនចង្កោមការងារអនុវត្តជាអាទិភាពចំនួន៣ទៀត៕ អត្ថបទ៖ ស៊ុម សុខជា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
