ប្រទេសរុស្ស៊ីសង្ឃឹមថា នឹងបង្កើនការនាំចេញផលិតផលនេសាទរបស់ខ្លួនទៅកាន់ប្រទេសចិន បន្ទាប់​ពីមានការហាមឃាត់របស់ចិនលើការនាំចូលអាហារសមុទ្រពីប្រទេសជប៉ុន ដោយសារ​មាន​ការ​បញ្ចេញទឹកមានសារធាតុវិទ្យុសកម្ម ដែលត្រូវបាន​ធ្វើ​ប្រព្រឹត្តិកម្ម​រួច​ហើយ​ចូល​ទៅ​ក្នុង​សមុទ្រ​ពី​រោង​ចក្រថាមពលនុយក្លេអ៊ែរ Fukushima ដែលបានរងការបំផ្លិចបំផ្លាញ។

Rosselkhoznadzor ដែលជាអង្គភាពឃ្លាំមើលសុវត្ថិភាពចំណីអាហាររុស្ស៊ី បានឲ្យដឹង​កាល​ពី​ខែ​កក្កដា​ថា រុស្ស៊ី គឺជាប្រទេសផ្គត់ផ្គង់ផលិតផលសមុទ្រដ៏ធំបំផុតមួយទៅកាន់ប្រទេសចិន ដោយ​ក្រុម​ហ៊ុន​រុស្ស៊ីចំនួន ៨៩៤ក្រុមហ៊ុន ត្រូវបានអនុញ្ញាតឲ្យនាំចេញអាហារសមុទ្រ។

ក្នុងសេចក្តីថ្លែងការណ៍មួយ កាលពីល្ងាចថ្ងៃសុក្រ (ទី២៥ ខែសីហា) អង្គភាព Rosselkhoznadzor បាននិយាយថា ខ្លួនកំពុងស្វែងរកការបង្កើនចំនួនក្រុមហ៊ុននាំចេញ។ សេចក្តី​ថ្លែងការណ៍នោះ បានឲ្យដឹងថា៖ «ទីផ្សារចិនជាទូទៅ កំពុងសន្យា​ទទួល​យក​ផលិតផល​ត្រី​របស់​រុស្ស៊ី។ យើងសង្ឃឹមថា នឹងបង្កើនចំនួនក្រុមហ៊ុន និងកប៉ាល់​រុស្ស៊ី​ដែល​មាន​បញ្ជាក់​វិញ្ញាបន​បត្រ បរិមាណផលិតផល និងប្រភេទរបស់ផលិតផល»។

សូមបញ្ជាក់ថា ប្រទេសចិន​បាន​ហាម​ឃាត់​ការ​នាំចូល​ចំណី​អាហារ​មួយ​ចំនួន​ពី​ប្រទេស​ជប៉ុន​រួច​ហើយ​ ប៉ុន្តែការហាមឃាត់គ្រប់យ៉ាង កាលពីថ្ងៃព្រហស្បតិ៍ (ទី២៤ ខែសីហា) ត្រូវបានធ្វើឡើង ដោយ​មានការព្រួយបារម្ភអំពី«ហានិភ័យនៃការប៉ះពាល់ពីសារធាតុវិទ្យុសកម្ម» បន្ទាប់​ពី​ប្រទេស​ជប៉ុន​​បានចាប់ផ្តើមបញ្ចេញទឹក ដែលធ្វើប្រព្រឹត្តិកម្មរួចហើយ។

យោងតាមទីភ្នាក់ងារជលផលរបស់រុស្ស៊ី បានឲ្យដឹងថា ប្រទេសរុស្ស៊ី​បាន​នាំ​ចេញ​ផលិតផល​សមុទ្រ​ចំនួន​ ២,៣លានតោន កាលពីឆ្នាំមុន ដោយមានតម្លៃប្រហែល ៦,១ពាន់​លាន​ដុល្លារ​អាមេរិក​ ដែលមានទំហំប្រហែលពាក់កណ្តាលនៃការនេសាទសរុបរបស់ខ្លួន ដោយប្រទេសចិន កូរ៉េខាងត្បូង និងជប៉ុនជាប្រទេសនាំចូលដ៏ធំបំផុត៕