នីហ្ស៊េ ៖ កាលពីថ្ងៃសៅរ៍ម្សិលមិញ ក្រុមអ្នកគាំទ្រមេដឹកនាំយោធានីហ៊្សេ បានជួបជុំគ្នានៅក្នុងពហុកីឡដ្ឋានជាតិប្រទេសមួយនេះ ដើម្បីអបអរខួប ១ខែនៃការគ្រប់គ្រងរបស់យោធា ហើយពួកគេបានអំពាវនាវឲ្យបណ្តេញចេញជាបន្ទាន់ឯកអគ្គរដ្ឋទូតបារាំង ។ 

របបសឹកនីហ៊្សេ ដែលរឹបអូសអំណាចនៅក្នុងរដ្ឋប្រហារកាលពីថ្ងៃទី ២៦ ខែកក្កដា បាននិយាយកាលពីថ្ងៃសុក្រថា ពួកគេបានបញ្ជាឲ្យឯកអគ្គរដ្ឋទូតបារាំងលោក Sylvain Itte ចាកចេញពីប្រទេសមួយនេះ ក្នុងរយៈពេល ៤៨ម៉ោង ស្របពេលដែលទំនាក់ទំងនរវាងប្រទេសនៅអាហ្វ្រិកខាងលិចមួយនេះ និងអតីតក្រុមអាណានិគមរបស់ពួកគេ កាន់តែធ្ងន់ធ្ងរ បន្ថែមទៀត ។ 

ដូចគ្នានឹងរដ្ឋប្រហារកាលពីពេលថ្មីៗកន្លងមកនេះនៅប្រទេសជិតខាងប៊ូគីណា ហ្វាសូ និងម៉ាលី ដែរ ការដណ្តើមគ្រប់អំណាចរបស់យោធានៅប្រទេសនីហ៊្សេ បានកើតមានឡើងសម្របពេលកើតមានរលកចលនាប្រឆាំងនឹងបារាំង ក្នុងនោះប្រជាពលរដ្ឋក្នុងស្រុកមួយចំនួន បានចោទប្រកាន់ប្រទេសនៅអឺរ៉ុបមួយនេះ ថាបានជ្រៀតជ្រែកចូលកិច្ចការផ្ទៃក្នុងរបស់ពួកគេ ។ 

នៅមុនពិធីដង្ហែក្បួនកាលពីថ្ងៃសៅរ៍ របបសឹកនីហ៊្សេ បានបញ្ជាឲ្យកងកម្លាំងប្រដាប់អាវុធរបស់ពួកគេ បន្តប្រុងជើងការខ្ពស់ ដោយពួកគេលើកឡើងពីការគំរាមកំហែងកើនឡើងនៃការវាយប្រហារ ៕