អាល្លឺម៉ង់ ៖ កាលពីថ្ងៃសៅរ៍ (២៦សីហា) ហ្វូងពលរដ្ឋអាល្លឺម៉ង់ បានប្រមូលផ្តុំគ្នានៅទីក្រុង Dusseldorf ក្នុងរដ្ឋ North Rhine-Westphalia (ណស រ៉ាញវេសហ្វេលីយ៉ា) ដែលជារដ្ឋមានប្រជាជនច្រើនបំផុតរបស់ប្រទេសអាល្លឺម៉ង់ ដើម្បីរិះគន់បណ្តាប្រទេសលោកខាងលិច ចំពោះការបង្កើនវិបត្តិនៅអ៊ុយក្រែនដោយការផ្គត់ផ្គង់អាវុធដល់ប្រទេសសនេះ។

ក្រុមបាតុករបានកាន់បដា និងផ្ទាំងក្ដារដែលសរសេរថា «យើងចង់បានសន្តិភាព» «គ្មានសង្រ្គាម» «អាវុធមិនអាចបង្កើតសន្តិភាពបានទេ» និងពាក្យស្លោកជាច្រើនផ្សេងៗទៀត ដោយទាមទារឱ្យសហរដ្ឋអាមេរិក និងប្រទេសលោកខាងលិចផ្សេងទៀត បញ្ឈប់ជាបន្ទាន់នូវការបញ្ជូនអាវុធទៅកាន់អ៊ុយក្រែន។ 

ពួកគេបានរិះគន់អង្គការសន្ធិសញ្ញាអាត្លង់ទិកខាងជើង (ណាតូ-NATO) ដែលចង់ធ្វើសង្រ្គាមជុំវិញពិភពលោក ដើម្បីផលប្រយោជន៍ផ្ទាល់ខ្លួន។

ក្រុមបាតុករបានរិះគន់រដ្ឋាភិបាលអាល្លឺម៉ង់ ពីកំណើនភាពតានតឹងនៅក្រៅប្រទេស ខណៈពេលដែលមិនយកចិត្តទុកដាក់ចំពោះបញ្ហាក្នុងស្រុករបស់ខ្លួន។ ទណ្ឌកម្មដ៏តឹងតែងដែលដាក់ដោយសហភាពអឺរ៉ុប (EU) លើប្រទេសរុស្ស៊ី បានបង្កឱ្យមានវិបត្តិថាមពលធ្ងន់ធ្ងរនៅក្នុងប្រទេសអាល្លឺម៉ង់ និងបានជំរុញឱ្យមានអតិផរណាបន្ថែមទៀតផងដែរ។ 

កំណើនសេដ្ឋកិច្ចរបស់ប្រទេសអាល្លឺម៉ង់ បានជាប់គាំងនៅក្នុងត្រីមាសទី២នៃឆ្នាំនេះ ជាមួយនឹងការស្ទង់មតិបង្ហាញថា បណ្ដាអាជីវកម្មអាល្លឺម៉ង់កំពុងបាត់បង់ទំនុកចិត្តលើចក្ខុវិស័យសេដ្ឋកិច្ចរបស់ប្រទេសនេះហើយ៕