ជើងឯកប្រណាំង Formula One ពិភពលោក ២ សម័យ Max Verstappen ទីបំផុត​អាច​តាម​ស្មើ​​កំណត់​ត្រារបស់កីឡាករអាល្លឺម៉ង់ Sebastian Vettel បានហើយក្នុងការឈ្នះ ៩ ទីលាន​ជាប់​គ្នា បន្ទាប់ពីជ័យជំនះនៅទីលាន Zandvoort ប្រទេសហូឡង់ដែលជាទឹកដីរបស់ខ្លួន។

ចាប់ផ្តើមបានត្រឹម ១ ជុំក៏មានភ្លៀងធ្លាក់ខណៈដែលការនាំមុខរបស់ Max Verstappen ក៏​បាន​បាត់បង់​តែមិនយូរប៉ុន្មានទេ និងបានត្រលប់មកនាំមុខវិញនៅជុំទី ២២ ក្នុងចំណោម ៧២ ជុំ។

កីឡាកររបស់ក្រុម Red Bull រូបនេះក៏បានមកដល់ទីព្រ័ត្រមុនគេដើម្បីក្តោបយកជ័យជំនះទី ១១ នៃ ១៣ ប្រកួតរដូវកាលនេះ តាមពីក្រោយដោយជើងឯក ២ សម័យផងដែររបស់ក្រុម Aston Martin, Fernando Alonso បានលេខ ២ និងលេខ ៣ កីឡាករបារាំង Pierre Gasly ឡើង​ពី​លេខ​៤ មកវិញ បន្ទាប់ពីអ្នកលេខ ៣ Sergio Perez ត្រូវពិន័យ ៥ វិនាទី។

ជ័យជំនះនៅពេលនេះគឺជា Hat-Trick ឈ្នះ ៣ ឆ្នាំជាប់គ្នានៅទីលាន Zandvoort នេះដែរ​ចាប់​តាំង​ពី​ទីលានចំណាស់នៅហូឡង់នេះវិលត្រលប់មកក្នុងកាលវិភាគរបស់ F1 វិញនៅឆ្នាំ ២០២១។

Max Verstappen នៅពេលនេះបន្តពន្លាតការនាំមុខក្នុងតារាងជើងឯកពិភពលោកដាច់អ្នកលេខ ២ មិត្តរួមក្រុម Sergio Perez ឡើងដល់ ១៣៨ ពិន្ទុ និងលេខ ៣ គឺ Fernando Alonso។

សូមរំលឹកថាកីឡាករអាល្លឺម៉ង់ Sebastian Vettel ដែលចូលនិវត្តន៍ទៅហើយ គឺជាកី​ឡាករ​ម្នាក់​គត់​ដែល​ឈ្នះ ៩ ទីលានជាប់គ្នាគិតមកដល់ពេលនេះ ពោលគឺកំណត់ត្រានេះធ្វើបាននៅឆ្នាំ ២០១៣ នៅពេលគ្រងជើងឯកពិភពលោកលើកទី ៤៕ អត្ថបទ៖នាង សុភាវុធ