ព្រះវិហារ៖ ឯកឧត្តម គីម រិទ្ធី អភិបាលខេត្តព្រះវិហារ បានបំផុសឱ្យមានការចូលរួមដាំដើមឈើ ​អោយបានគ្រប់ៗគ្នា​ គ្រប់ប្រភេទ ​និងគ្រប់ទីកន្លែងអោយបានច្រើន ​តាមលទ្ធភាពដែល​អាចធ្វើ​ទៅបាន។

ថ្លែងក្នុងពិធីដាំកូនឈើអបអរសាទរទិវារុក្ខទិវា៩កក្កដាឆ្នាំ២០២៣ឯកឧត្តម គីម រិទ្ធី អភិបាល នៃ​គណៈអភិបាលខេត្តព្រះវិហារ បានណែនាំឱ្យចូលរួមជួយទប់ស្កាត់​ បញ្ឈប់ការកាប់ឈើ ​ការ​កាប់រានដុតឈូសឆាយដីព្រៃ ​ដើម្បីថែរក្សា ​ការពារព្រៃឈើទុក​សម្រាប់កូនចៅរបស់​យើង​នៅគ្រប់ជំនាន់ជាបន្តទៀត។

សូមបញ្ជាក់ថា នៅព្រឹកថ្ងៃទី២៨ ខែសីហា ឆ្នាំ២០២៣នេះ ​ស្ថិតនៅក្នុងបរិវេណសាលាបឋមសិក្សា​ទំនប់ក្នុងភូមិទំនប់ សង្កាត់ប៉ាលហាល ក្រុងព្រះវិហារ រដ្ឋបាលខេត្តព្រះវិហារមានរៀបចំទិវារុក្ខទិវា៩ កក្កដា ​ឆ្នាំ២០២៣ ព្រមទាំងវត្តមានចូលរួមពីសំណាក់ថ្នាក់ដឹកនាំមន្ទីរ អង្គភាពនានាជុំវិញខេត្ត និងបងប្អូនប្រជាពលរដ្ឋជាច្រើនរូប។

ក្នុងពិធីនោះ លោក ពឹង ទ្រីដា ប្រធានមន្ទីរកសិកម្មរុក្ខាប្រមាញ់ និងនេសាទខេត្តព្រះវិហារ បាន​ឱ្យដឹងថា ពិធីដាំកូនឈើនៅក្នុងថ្ងៃនេះ ​ខណ្ឌរដ្ឋបាលព្រៃឈើព្រះវិហារ ​បានដាំកូនឈើ​ប្រភេទ​ចម្រុះសរុបចំនួនជិត១០០០ដើម ក្នុងនោះកូនឈើក្រញូង១០០ដើម កូនឈើបេងចំនួន២០០ដើម និងកូនឈើធ្នង់ចំនួន៧០០ដើម ដាំក្នុងបរិវេន​សាលាបឋមសិក្សាទំនប់ ស្ថិតក្នុងភូមិទំនប់ ឃុំប៉ាលហាល ក្រុងព្រះវិហារ ។

លោកប្រធានមន្ទីរកសិកម្មរុក្ខាប្រមាញ់ បានបន្ថែមទៀតថា ខណ្ឌរដ្ឋបាលព្រៃឈើព្រះវិហារ ក៏បាន​ចូលរួម​ចំណែកចែកកូនឈើហូបផ្លែសរុបចំនួន៦០០ដើម ក្នុងនោះមានកូនស្វាយចំនួន២០០ដើម កូនខ្នុរចំនួន២០០ដើម កូនអំពិលផ្អែមចំនួន១០០ដើម និងកូនទៀបបារាំងចំនួន១០០ដើម ជូនដល់ប្រជាពលរដ្ឋយកទៅដាំនៅក្នុងលំនៅដ្ឋានផងដែរ។

នៅក្នុងឱកាសនោះ ឯកឧត្តម គីម រិទ្ធី ក៏បានថ្លែងអំណរគុណដល់មន្ទីរ កសិកម្មខេត្តក៏ដូច​ជាខណ្ឌរដ្ឋបាល​ព្រៃឈើខេត្ត ព្រមទាំង អាជ្ញាធរដែនដី​ គ្រប់លំដាប់ថ្នាក់ មន្ត្រីរាជការ កងកម្លាំង​គ្រប់​ប្រភេទ ​លោកគ្រូអ្នកគ្រូ សិស្សានុសិស្ស និងបងប្អូនប្រជាពលរដ្ឋ ដែលបានសហការ រៀបចំពិធីដ៏មានសារៈសំខាន់នេះឡើង។

ឯកឧត្តម បានឱ្យដឹងថា ពិធីរុក្ខទិវា ជាចលនាបំផុស ដាំដើមឈើ ដែលជាប្រពៃណីដ៏ល្អផូរផង់ ឧត្តុងឧត្តមរបស់ប្រជាជាតិយើង។ ចលនានេះមានតាំងពី ​សម័យសង្គមរាស្ត្រនិយម ក្រោម​ព្រះរាជបូជនីយកិច្ចផ្តួចផ្តើម និងដឹកនាំរបស់ព្រះករុណា ព្រះមហាវីរក្សត្រ ព្រះវររាជបិតាជាតិ​ខ្មែរព្រះបរមរតនកោដ្ឋ ​តាំងពីទស្សវត្ស៣០មក ដោយមានការចូលរួមយ៉ាង ​ផុសផុល ពី​ប្រជាពលរដ្ឋគ្រប់ស្រទាប់ ក្លាយទៅជាសកម្មភាពទូលំទូលាយក្នុងចលនាទិវាពលកម្ម ដាំដើមឈើនៅក្នុងសង្គម ដែលទីបំផុតត្រូវ បានទទួលស្គាល់ ជាពិធីប្រពៃណីជាតិមួយ ហៅថា ពិធីរុក្ខទិវា ដែលកំណត់ដោយព្រះរាជក្រឹត្យលេខ ៧៣៨ នស.រកត ចុះថ្ងៃទី៨ ខែសីហា ឆ្នាំ ១៩៥២៕