ស៊ីហ្គេម៖ រាជរដ្ឋាភិបាលកម្ពុជាបានចេញ ស.ជ.ណ អនុញ្ញាតឲ្យក្រុមជម្រើសជាតិប្រមូលផ្ដុំហ្វឹកហាត់ឡើងវិញហើយ ខណៈគ្រូបង្វឹក កីឡាករ-កីឡាការិនីដែលជាមន្ត្រីរាជការ កងកម្លាំងប្រដាល់អាវុធត្រូវព្យួរការងារពីអង្គភាព មន្ទីរ ក្រសួង ស្ថាប័នដើមរបស់ខ្លួនដោយរក្សាប្រាក់បៀវត្ស ដើម្បីមកបង្ហាត់ក្រុមជម្រើសជាតិ តាមតម្រូវការកម្មវិធីហ្វឹកហាត់វិទ្យាសាស្ត្រកីឡា ៨ម៉ោងក្នុងមួយថ្ងៃរហូតដល់ចប់ស៊ីហ្គេម និងអាស៊ានប៉ារ៉ាហ្គេមឆ្នាំ២០២៣។
ឯកឧត្ដមបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងជាអនុប្រធានអចិន្ត្រៃយ៍នៃគណៈកម្មាធិការជាតិ រៀបចំការប្រកួតកីឡាស៊ីហ្គេមលើកទី៣២ ឆ្នាំ២០២៣ (CAMSOC) បានថ្លែងក្នុងកិច្ចប្រជុំគណៈអចិន្ត្រៃយ៍នៅថ្ងៃទី២៥ ខែឧសភានេះថា ការសម្រេចរបស់រាជរដ្ឋាភិបាលកម្ពុជានេះ ក្រោយទទួលបានសេចក្ដីសម្រេចពីសម្ដេចតេជោនាយករដ្ឋមន្ត្រី ហ៊ុន សែន តាមរយៈការស្នើសុំរបស់សម្ដេចពិជ័យសេនា ទៀ បាញ់ ប្រធានគណៈកម្មាធិការជាតិ CAMSOC កាលពីថ្មីៗ។ ក្រោយទទួលបានការសម្រេចពីរាជរដ្ឋាភិបាលនេះ ឯកឧត្ដម វ៉ាត់ ចំរើន អគ្គលេខាធិការ CAMSOC បានធ្វើការជំរុញសហព័ន្ធកីឡាជាតិទាំងអស់ ដែលមានលទ្ធភាព និងសុវត្ថិភាពអាចហ្វឹកហាត់បាន ត្រូវបើកយុទ្ធនាការប្រមូលផ្ដុំហ្វឹកហាត់វិញជាបន្ទាន់ ក្រោមស្មារតីទទួលខុសត្រូវខ្ពស់ដោយគោរពវិធានការ ៣ការពារ និង ៣កុំ ដើម្បីពង្រឹងគុណផលកីឡាឆ្ពោះទៅស៊ីហ្គេមនៅវៀតណាមនាចុងឆ្នាំ២០២១ ពិសេសត្រៀមស៊ីហ្គេម និងអាស៊ានប៉ារ៉ាហ្គេមឆ្នាំ២០២៣ នៅកម្ពុជា។
ដោយឡែកលក្ខខណ្ឌពិសេសសម្រាប់គ្រូបង្វឹក និងកីឡាករ-កីឡាការិនីដែលជាមន្ដ្រីរាជការ ឬកងកម្លាំងវិញ គឺរាជរដ្ឋាភិបាលបានសម្រេចឲ្យព្យួរការងារបណ្ដោះអាសន្ន ដោយរក្សាប្រាក់បៀវត្សដដែលដើម្បីពង្រឹងការហ្វឹកហាត់ ស្របតាមវិទ្យាសាស្ត្រកីឡាយ៉ាងហោច ៨ម៉ោងក្នុងមួយ។ ចំណែកីឡាករ-កីឡាការិនីដែលជាសិស្ស និងនិស្សិតវិញក៏ត្រូវអនុវត្តលក្ខខណ្ឌពិសេសថ្មី ដើម្បីសម្រួលដល់ការហ្វឹកហាត់កីឡាជំនាញផងដែរ។ នេះបើតាមការបញ្ជាក់បន្ថែមរបស់ឯកឧត្ដម វ៉ាត់ ចំរើន។ គួរបញ្ជាក់ថា នេះគឺជាកំណែទម្រង់ថ្មីមួយទៀតក្នុងវិស័យកីឡា ដែលទទួលបានការយកចិត្តទុកដាក់ពីរាជរដ្ឋាភិបាល ដើម្បីជំរុញការអភិវឌ្ឍន៍ និងពង្រឹងគុណផលកីឡាជំនាញ ត្រៀមឆ្ពោះទៅធ្វើម្ចាស់ផ្ទះការប្រកួតកីឡាស៊ីហ្គេម ដែលគ្រោងប្រកួតពីថ្ងៃទី៥ ដល់ថ្ងៃទី១៧ ខែឧសភា ឆ្នាំ២០២៣ និងអាស៊ានប៉ារ៉ាហ្គេមដែលគ្រោងប្រកួតពីថ្ងៃទី១ ដល់ថ្ងៃទី១០ ខែមិថុនា ឆ្នាំ២០២៣៕ អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
