ក្រុមអេស្ប៉ាញ Atletico Madrid បានបំបែកកំណត់ត្រាមួយនៅក្របខណ្ឌបាល់ទាត់អេស្ប៉ាញ La Liga នៅ​យប់ថ្ងៃចន្ទម្សិលមិញក្រោយយកឈ្នះនៅទឹកដី Rayo Vallecano ៧-០ ដែលជាជ័យជំនះ​ធំបំផុត​នៅ​​ក្រៅដី​មិនធ្លាប់មានពីមុនមក។

ក្រុមរបស់លោក Diego Simeone បាននាំមុខមុន ៣-០ ទៅហើយនៅត្រឹម ៣៦ នាទី​ដោយ​គ្រាប់​បាល់​របស់​កីឡាករ ៣ នាក់រួមមាន Antoine Griezmann, Memphis Depay និង Mahuel Molina។

ឈានចូលវគ្គទីពីរ ៤ គ្រាប់ទៀតកើតឡើងត្រឹម ១៣ នាទីប៉ុណ្ណោះដោយ Alvaro Morata ពីរគ្រាប់ Angel Correa និង Marcos Llorente ម្នាក់មួយគ្រាប់។

ជ័យជំនះនេះធ្វើឱ្យ Atletico Madrid ឡើងឈរលេខ ២ ក្នុងតារាងមាន ៧ ពិន្ទុតាមពីក្រោយ Real Madrid ដែលមាន ៩ ពិន្ទុក្រោយឈ្នះទាំង ៣ ប្រកួត។

អ្វីដែលជាបញ្ហាតែមួយសម្រាប់ Atletico Madrid នោះគឺ បាត់បង់ Memphis Depay ដែលមានរបួស ប្តូរចេញតាំងពីវគ្គទី ១។

សូមរំលឹកថានេះជាលើកទី ២ ដែល Atletico Madrid ឈ្នះគូប្រកួត ៧ គ្រាប់បែបនេះនៅ La Liga ក្នុងសតវត្សទី ២១ នេះ បន្ទាប់ពីធ្លាប់ឈ្នះ Getafe ៧-០ បែបនេះដែរកាលពីឆ្នាំ ២០១៣៕ អត្ថបទ៖នាង សុភាវុធ