ភ្នំពេញ៖ ក្រសួងវប្បធម៌ និងវិចិត្រសិល្បៈ នៃព្រះរាជាណាចក្រកម្ពុជា និងសា្ថនទូត​សហរដ្ឋអាមេរិក​នៅភ្នំពេញ ព្រឹកថ្ងៃទី៣០ ​ខែសីហានេះ ​បានចុះហត្ថលេខាលើកិច្ចព្រមព្រៀង ​លើកទី៥ ស្ដីពីកិច្ច​សហប្រតិបត្តិការផ្នែកវប្បធម៌ ​រវាងប្រទេសទាំងពីរ ​ដែលបញ្ជាក់ជាថ្មី នូវការប្ដេជ្ញាចិត្ត​យូរអង្វែងរបស់សហរដ្ឋអាមេរិក ​ក្នុងការអភិរក្ស និងជួសជុលបេតិកភណ្ឌវប្បធម៌​ដ៏សម្បូរបែបរបស់កម្ពុជា។

លោកជំទាវបណ្ឌិតសភាចារ្យ ភឿង សកុណា រដ្ឋមន្រី្តក្រសួងវប្បធម៌ និងវិចិត្រសិល្បៈ បានថ្លែងថា អស់រយៈពេលជាច្រើនទសវត្សរ៍មកហើយ​ ដែលវត្តុបុរាណរបស់ព្រះរាជាណាចក្រកម្ពុជា ត្រូវបាន​លួច និងទទួលទិញដោយអ្នកធ្វើសមុច្ច័យ ​ជាលក្ខណៈឯកជន និងបណ្តាសារមន្ទីរនៅទូទាំង​ពិភពលោក។ វត្តុសិល្បៈច្រើនរាប់មិនអស់ រួមមាន៖ វត្ថុបុរាណខ្មែរនានា រូបបដិមា គ្រឿងលម្អ ស្ថាបត្យកម្ម និងវត្ថុសិល្បៈជាប្រភេទកុលាលភាជន៍ និងធ្វើពីសំរិទ្ធ ត្រូវបានគេលក់ និងនៅបន្តដាក់លក់ដោយខុសច្បាប់នៅលើទីផ្សារវត្ថុសិល្បៈអន្តរជាតិ វិធានការប្រកបដោយប្រសិទ្ធភាព ដើម្បីទប់ស្កាត់ការជួញដូរខុសច្បាប់នូវវត្ថុបុរាណ និងសម្បតិ្តវប្បធម៌ គឺអាស្រ័យលើកិច្ចសហប្រតិបតិ្តការយ៉ាងជិតស្និទិ្ធរវាងភាគីពាក់ព័ន្ធសំខាន់ៗ។ ដោយផ្អែកលើទីផ្សារលក់វត្ថុសិល្បៈនៅសហរដ្ឋអាមេរិក កិច្ចសហប្រតិបតិ្តការវាង​ព្រះរាជាណា​ចក្រកម្ពុជា និងសហរដ្ឋអាមេរិក គឺមានសារៈសំខាន់ណាស់ក្នុងការប្រឆាំង និងការជួញដូរវត្ថុបុរាណ​ខុសច្បាប់។

ជាមួយគ្នានោះដែរ ឯកឧត្តម W. Patrick Murphy ឯកអគ្គរដ្ឋទូតវិសាមញ្ញ និងពេញសមត្ថភាព នៃសហរដ្ឋអាមេរិក ប្រចាំព្រះរាជាណាចក្រកម្ពុជា បានលើកឡើងថា ការបន្ត MOU រយៈពេល​៥ឆ្នាំទៀតនេះ ​រវាងសហរដ្ឋអាមេរិក និងព្រះរាជាណាចក្រកម្ពុជា ​ទាក់ទងនិង «ការដាក់កម្រិតហាម​ប្រាម​នូវការនាំចូលប្រភេទវត្ថុបុរាណ និងវត្ថុជាតិពន្ធុវិទ្យានៃប្រទេសកម្ពុជា និងកាត់បន្ថយការ​លួចប្លន់​នៃវត្ថុបុរាណដ៏ល្អឯកពីប្រទេសកម្ពុជា»។

ការបន្ត MOU នេះនឹងបន្តការផ្លាស់ប្តូរគ្នានូវវត្ថុបុរាណ និងវត្ថុជាតិពន្ធុវិទ្យាសម្រាប់បំណងផ្នែកវប្បធម៌ អប់រំ និងវិទ្យាសាស្រ្ត ដើម្បីផ្សព្វផ្សាយឲ្យសាធារណជនយល់កាន់តែច្បាស់ និងផ្តល់តម្លៃ ដល់បេតិកភណ្ឌវប្បធម៌ដ៏សម្បូរបែបរបស់កម្ពុជា។

ជាចុងក្រោយឯកឧត្តម W. Patrick Murphy បានប្រកាសផងដែរនូវជំនួយថវិកាចំនួន ៤៥ម៉ឺនដុល្លារ​របស់​ក្រសួងការបរទេសសហរដ្ឋអាមេរិក ​តាមរយៈមូលនិធិឯកអគ្គរដ្ឋទូតសម្រាប់ការអភិរក្សវប្បធម៌ ជូនដល់ក្រសួងវប្បធម៌ និងវិចិត្រសិល្បៈ ​សម្រាប់បន្តការងារអភិរក្សនៅប្រាសាទភ្នំបាខែង៕អត្ថបទ រដ្ឋា