កាលពីថ្ងៃអង្គារម្សិលមិញ វិមានក្រឹមឡាំងនិយាយថា បរាជ័យបេសកកម្ម Luna-25 របស់រុស្ស៊ី ទៅកាន់ឋានព្រះច័ន្ទកាលពីដើមខែនេះ គ្មានអ្វីជាបញ្ហាធ្ងន់ធ្ងរនោះទេ ហើយរឿងដែលសំខាន់បំផុតនោះ គឺពួកយើងនៅតែបន្តកម្មវិធីរុករុកទីអវកាសរបស់រុស្ស៊ីដដែល ។ 

 នៅក្នុងការទូរស័ព្ទជាមួយក្រុមអ្នកសារព័ត៌មាន អ្នកនាំពាក្យវិមានក្រឹមឡាំងលោក Dmitry Peskov និយាយថា នេះមិនមែនជាហេតុផលត្រូវអស់សង្ឃឹមនោះទេ ឬហែកសក់របស់ពួកយើងនោះឡើយ ។ នេះគឺជាហេតុផលដែលត្រូវវិភាគលើមូលហេតុបរាជ័យ និងលុបបំបាត់វានៅពេលក្រោយ ។ 

 គួរឲ្យដឹងថា Luna-25ដែលជាបេសកកម្មឋានព្រះច័ន្ទលើកដំបូងរបស់រុស្ស៊ី ចាប់តាំងពីឆ្នាំ ១៩៧៦ បានធ្លាក់លើឋានព្រះច័ន្ទកាលពីថ្ងៃទី ១៩ ខែសីហា ក្រោយការចូលគន្លងពុំបានសម្រេច គឺជាអ្វីដែលបរទេសយល់ឃើញថាជាផលប៉ះពាល់ដ៏ធ្ងន់ធ្ងរមួយដល់កម្មវិធីអវកាសរបស់រុស្ស៊ី ។ រយៈពេលប៉ុន្មានថ្ងៃក្រោយមក យានអវកាសឥណ្ឌា បានចុះចតនៅលើឋានព្រះច័ន្ទដោយជោគជ័យ ។ 

 លោក Peskov និយាយថា រឿងសំខាន់គឺពួកយើងមិនឈប់ត្រឹមហ្នឹង ។ ផែនការរបស់ពួកយើង គឺមានមហិច្ឆិតាខ្ពស់ ហើយពួកយើងនឹងអនុវត្តន៍បន្ថែមទៀត ។ 

 លោកបន្តទៀតថា គ្មានអ្វីដែលសង្ស័យគឺប្រទេសទាំងមូល បាននឹងកំពុងបន្តបេសកកម្មអវកាសនៅឋានព្រះច័ន្ទ ហើយពួកយើងក៏ដឹងដែរថា ការរុករកទីអវកាស ការអនុវត្តន៍កម្មវិធីអវកាសដ៏ស្មុគស្មាញនៅទីអវកាស មិនអាចកើតឡើងដោយគ្មានបរាជ័យបាននោះទេ ដូច្នេះហើយវាមិនមែនជាហេតុផលត្រូវអស់សង្ឃឹមនោះឡើយ ៕