ក្រសួងការបរទេសសហរដ្ឋអាមេរិក បាននិយាយថា អ្នកការទូតជាន់ខ្ពស់សហរដ្ឋអាមេរិក លោកស្រី វីកតូរៀ នូឡែនដ៍ ( Victoria Nuland) កាលពីថ្ងៃអង្គារ បាននិយាយជាមួយរដ្ឋមន្ត្រីការបរទេសប៉ាគីស្ថាន លោក ចាលីល អាបាស ជីឡានី (Jalil Abbas Jilani) ហើយបានពិភាក្សាអំពីសារៈសំខាន់នៃ«ការបោះឆ្នោតទាន់ពេលវេលា ដោយសេរី និងយុត្តិធម៌» នៅក្នុងប្រទេសអាស៊ីខាងត្បូងនេះ។

ក្រសួងការបរទេសអាមេរិក បាននិយាយនៅក្នុងសេចក្តីថ្លែងការណ៍មួយថា៖«អនុរដ្ឋមន្ត្រីការបរទេសស្តីទី លោកស្រី នូឡែនដ៍ និងរដ្ឋមន្ត្រីការបរទេសជីឡានី បានពិភាក្សាអំពីសារៈសំខាន់នៃការបោះឆ្នោតទាន់ពេលវេលា ដោយសេរី និងយុត្តិធម៌ ក្នុងលក្ខណៈដែលស្របតាមច្បាប់និងរដ្ឋធម្មនុញ្ញរបស់ប្រទេសប៉ាគីស្ថាន»។

នយោបាយប៉ាគីស្ថាន បានធ្លាក់ក្នុងវិបត្តិអស់រយៈពេលជាងមួយឆ្នាំហើយ ដោយអតីតនាយករដ្ឋមន្ត្រី លោក អ៊ីមរ៉ាន ខាន់ (Imran Khan) ដែលត្រូវបានបណ្តេញចេញពីតំណែងក្នុងការបោះឆ្នោតសម្តែងការមិនទុកចិត្តពីសភា កាលពីឆ្នាំមុន។ 

លោកខាន់ បានស្តីបន្ទោសយោធារបស់សហរដ្ឋអាមេរិក និងប៉ាគីស្ថានចំពោះការបណ្តេញរូបលោក។ ទាំងក្រុងវ៉ាស៊ីនតោន និងយោធា បានបដិសេធការអះអាងរបស់លោក។ សេចក្តីថ្លែងការណ៍របស់ក្រសួងការបរទេសស្តីពីសន្ទនាតាមទូរស័ព្ទរវាងលោកស្រី ណូឡែនដ៍ និងលោក ជីឡានី មិនបាននិយាយអំពីលោកខាន់ទេ។