កីឡាករប្រណាំងកង់អូស្រ្តាលី Kaden Groves បានបន្តឈ្នះពីរដំណាក់កាលជាប់គ្នា បន្ទាប់​ពី​ឈ្នះ​ដំណាក់​កាលទី ៥ នៃព្រឹត្តិការណ៍ប្រណាំងកង់ Grand Tour, Vuelta a Espana តែមិន​អាច​ក្លាយ​ជាអ្នកនាំមុខក្នុងតារាងរួមបានឡើយ។

ដំណាក់កាលទី ៥ ដែលមានចំងាយផ្លូវ ១៨៦.៥ គីឡូម៉ែត្រ បាន​បញ្ចប់​ដោយ​មាន​ការ​ប្រកួត​ប្រជែង​គ្នា​ខ្លាំង​នៅចំនុចចុងក្រោយ តែកីឡាកររបស់ក្រុម Alpecin-Deceuninck រូបនេះ​អាច​រក្សា​ការ​នាំ​មុខ​របស់ខ្លួនបានដោយមកដល់ទីព្រ័ត្រមុនគេប្រើពេល ៤ ម៉ោង ២៣ នាទី ៤៣ វិនាទី តាម​ពី​ក្រោយ​ដោយកីឡាករអ៊ីតាលី Filippo Ganna របស់ក្រុម Ineos Grenadiers និងលេខ ៣ កីឡាករ​ប៊ែលហ្ស៊ិក Dries Van Gestel។

យ៉ាងណាក្តីក្រោយ ៥ ដំណាក់កាលនេះ អ្នកការពារតំណែងជើងឯកសញ្ជាតិប៊ែលហ្ស៊ិក Remco Evenepoel ជិះឱ្យក្រុម Soudal-Quick-Step នៅតែ​បន្ត​នាំ​មុខ​គេ​ដដែល​ក្នុង​តារាង​ពេល​វេលា​រួម​តាម​ពី​ក្រោយដោយកីឡាករអេស្ប៉ាញ Enric Mas ដដែលយឺតជាង ១១ វិនាទី និងលេខ ៣ កីឡាករ​បារាំង Lenny Martinez ដដែលយឺតជាង ១៧ វិនាទី។

សម្រាប់ដំណាក់កាលទី ៦ ថ្ងៃព្រហស្បតិ៍នេះមានចំងាយផ្លូវ ១៨១.៣ គីឡូម៉ែត្រ៕ អត្ថបទ៖នាង សុភាវុធ