ភ្នំពេញ៖ លោកស្រី Carmen Moreno ឯកអគ្គរដ្ឋទូតសហភាពអឺរ៉ុបប្រចាំកម្ពុជា ថ្លែងថា កម្ពុជា​ជា​ប្រទេសមានធនធាន និងសក្តានុពលជាងគេក្នុងតំបន់ទាក់ទង នឹងការស្វែងរកសន្តិភាព។

ការថ្លែងរបស់លោកស្រី Carmen Moreno ឯកអគ្គរដ្ឋទូតសហភាពអឺរ៉ុបប្រចាំកម្ពុជា ក្នុងពេលជួប​សម្តែង​ការគួរសម និងជម្រាបលាជាមួយ ឯកឧត្តម កែវ រ៉េមី ប្រធានគណៈកម្មាធិការសិទ្ធិមនុស្ស​កម្ពុជា នៅថ្ងៃទី៣១ ខែសីហា ឆ្នាំ២០២៣។

នាឱកាសនោះ លោកស្រីឯកអគ្គរដ្ឋទូតសហភាពអឺរ៉ុបប្រចាំកម្ពុជា មានប្រសាសន៍ថា ចំពោះតួនាទី​ក្នុងតំបន់ និងអន្តរជាតិ កម្ពុជាមិនមែនជាប្រទេសក្រីក្រទៀតទេ ទាំងធនធាន និងបទពិសោធន៍ ជាពិសេសកម្ពុជាជាប្រទេសមានសក្តានុពលជាងគេក្នុងតំបន់ទាក់ទងទៅនឹងការស្វែងរកសន្តិភាព​និងការបង្រួបបង្រួមជាតិ ព្រមទាំងមានសមិទ្ធផលធំៗដូចជាការកាត់សេចក្តីដោយជោគជ័យ​នៃរបបខ្មែរក្រហម។

លោកស្រីឯកអគ្គរដ្ឋទូតសហភាពអឺរ៉ុប មានប្រសាសន៍ទៀតថា ហេតុដូចនេះ កម្ពុជាដែលមាន​អំណាចទន់ (Soft Power)ក្នុងដៃគប្បីមាន​មហិច្ឆតា​ និងដើរតួនាទីឱ្យកាន់តែសកម្មនិងនាំមុខ ដើម្បី​ចែករំលែកបទពិសោធន៍និងសមិទ្ធផលទាំងអស់របស់ខ្លួនទៅលើឆាកតំបន់និងអន្តរជាតិ។

ក្រៅពីនោះ លោកស្រីឯកអគ្គរដ្ឋទូត បានវាយតម្លៃខ្ពស់ចំពោះកិច្ចសហប្រតិបត្តិការយ៉ាងល្អប្រសើរ​របស់​សហភាពអឺរ៉ុបក្នុងរយៈពេល៤ឆ្នាំកន្លង ដែលបានរួមចំណែកដល់ដំណើរការកាត់​សេចក្ដីរបស់​អង្គជំនុំជម្រះវិសាមញ្ញក្នុងតុលាការកម្ពុជា​ (អ.វ.ត.ក.) ប្រកបដោយជោគជ័យ និងបន្តគាំទ្រដល់ការ​អនុវត្តមុខងារសេសសល់របស់​អ.វ.ត.ក និងលទ្ធផលរំពឹងទុកសម្រេចបានក្នុងរយៈពេល៣ឆ្នាំ ពីឆ្នាំ២០២៣ ដល់២០២៥ ដោយបានលើកឡើងអំពីសារៈសំខាន់​នៃការងារអប់រំ និងផ្សព្វផ្សាយ​បណ្ណសារនៃសំណុំរឿង ក៏ដូចជាដំណើរការកាត់សេចក្ដីរបស់សាលាក្ដីខ្មែរក្រហមឱ្យ​បាន​ទូលំទូលាយ និងមានអត្ថន័យដល់សាធារណជន ​និងយុវជនជំនាន់ក្រោយ ព្រមទាំងនៅថ្នាក់តំបន់​និងអន្តរជាតិ ដែលជាសមិទ្ធផលនិងកេរ្ត៍ដំណែលរបស់ជាតិ។

ជាការឆ្លើយតប ឯកឧត្ដម កែវ រ៉េមី បានបញ្ជាក់ថា រដ្ឋបាលសាលាក្ដីខ្មែរក្រហមកំពុងតែមមាញឹក​ក្នុងការរៀបចំ ​និងកសាងបន្ទប់តាមស្ដង់ដារអន្តរជាតិសម្រាប់គ្រប់គ្រង និងរក្សាបណ្ណសារសំណុំរឿង ដែលមានជិត៤លានទំព័រ, កសាងបណ្ណាល័យ និងបន្ទប់សវនាការត្រាប់សម្រាប់បម្រើឱ្យ​ការងារ​ផ្សព្វផ្សាយ ស្រាវជ្រាវ និងបណ្ដុះបណ្ដាល។

លើសពីនេះ ឯកឧត្តម កែវ រ៉េមី បានលើកឡើងទៀតថា ក្រោមគតិបណ្ឌិតដឹកនាំដ៏ឈ្លាសវៃរបស់​ឯកឧត្តមកិត្តិទេសាភិបាលបណ្ឌិត ​ហ៊ុន ម៉ាណែត នាយករដ្ឋមន្ត្រី បានយកចិត្តទុដាក់ខ្ពស់លើការងារ​អប់រំ និង ផ្សព្វផ្សាយក្នុងស្មារតីឱ្យអ្នកស្រាវជ្រាវ និងយុវជនជំនាន់ក្រោយទទួលបានព័ត៌មាន​ពេញលេញលើ ប្រវត្តិសាស្ត្ររបស់ខ្លួន ដើម្បីរក្សាឱ្យបាននូវសុខសន្តិភាព, ពង្រឹងដល់ការចងចាំ និងការមិនវិលត្រលប់ឡើងវិញនៃរបបឃោរឃៅបែបនេះនៅក្នុងសង្គមជាតិ។