ប្រទេសស៊ូដង់កំពុងទប់ទល់កង្វះប្រេងឥន្ធនៈធ្ងន់ធ្ងរ ខណៈការប្រយុទ្ធប្រដាប់អាវុធដែលអូសបន្លាយពេល បានបង្ខំឲ្យរោងចក្រចម្រាញ់ប្រេងធំបំផុតរបស់ប្រទេសនេះបានបិទ និងបានបង្អាក់ដល់សង្វាក់ផ្គត់ផ្គង់។ រយៈពេល៤ខែក្នុងការប៉ះទង្គិចគ្នារវាងកងកម្លាំងប្រដាប់អាវុធស៊ូដង់(SAF) និងកងកម្លាំងគាំទ្ររហ័សយោធាប៉ារ៉ា (RSF) ជាការវិវឌ្ឍន៍ដ៏ធំរបស់ប្រទេសអាហ្វ្រិកមួយនេះ កំពុងធ្លាក់ចុះក្នុងស្ថានភាពធ្ងន់ធ្ងរចំពោះការខាតបង់ដោយសារតែអំពើហិង្សា។ វិបត្តិថាមពល បានវាយប្រហារមិនត្រឹមតែនៅរដ្ឋធានី Khartoum និងតំបន់ Darfur ភាគខាងលិចប៉ុណ្ណោះទេដែលការប្រយុទ្ធគ្នាកើតឡើង ប៉ុន្តែថែមទាំងរដ្ឋGezira និងរដ្ឋAl Qadarif ជាកន្លែងដែលស្ថានភាពសន្តិសុខធ្លាប់តែមានស្ថិរភាព។

នៅក្នុងទីក្រុង Port Sudan ជាទីក្រុងកំពង់ផែ ក្នុងរដ្ឋសមុទ្រក្រហម របស់ប្រទេសស៊ូដង់ភាគខាងកើត ស្ថានីយ៍ឧស្ម័នភាគច្រើន ត្រូវបានបង្ខំឲ្យបិទបន្ទាប់ពីអស់ប្រេងឥន្ធនៈ។ ពលរដ្ឋភាគច្រើន បានងាកទៅរកទីផ្សារខ្មៅ ជាកន្លែងដែលតម្លៃប្រេងសាំងមានតម្លៃ៣,៥ដងនៃតម្លៃប្រេងផ្លូវការ។ ពលរដ្ឋដែលពុំអាចទ្រទ្រង់បានចំពោះតម្លៃថ្លៃហួសប្រមាណ គ្មានជម្រើសនោះទេក្រៅពីតម្រង់ជួរទាំងយប់ថ្ងៃនៅមុខស្ថានីយ៍ឧស្ម័នមួយចំនួនដែលនៅតែធ្វើប្រតិបត្តិការ។ ការតម្រង់ជួរជាញឹកញាប់មានប្រវែងច្រើនគីឡូម៉ែត្រ។

ប្រទេសស៊ូដង់មិនខ្វះធនធានប្រេងនោះទេ។ រោងចក្រចម្រាញ់ប្រេងទីក្រុងKhartoum ជារោងចក្រប្រេងធំបំផុតនៅជាយរដ្ឋធានី ផលិតប្រេងម៉ាស៊ូត ប្រេងសាំង និងឥន្ធនៈរាវ ដែលអាចបំពេញតម្រូវការក្នុងស្រុក៧០ភាគរយ។ ទោះជាយ៉ាងណា រោងចក្រចម្រាញ់ប្រេង ត្រូវបានបង្ខំឲ្យផ្អាកប្រតិបត្តិការរបស់ខ្លួនបន្ទាប់ពីការផ្ទុះឡើងជម្លោះប្រដាប់អាវុធកាលពីខែមេសា បណ្តាលឲ្យមានកង្វះច្រើនក្នុងការផ្គត់ផ្គង់ប្រេងឥន្ធនៈរបស់ប្រទេស។ កង្វះប្រេងឥន្ធនៈ ក៏បានដាក់ភាពប្រឈមចំពោះការផ្គត់ផ្គង់អគ្គិសនី។ ទីក្រុង Port Sudan ជួបការរំខានដោយសារការកាត់ផ្តាច់អគ្គិសនីរៀងរាល់ថ្ងៃ ដែលដាក់ទម្ងន់លើប្រព័ន្ធវេជ្ជសាស្ត្រដែលប៉ះពាល់ខ្លាំងរួចទៅហើយ និងគំរាមកំហែងដល់ជីវិតរបស់អ្នកជំងឺជាច្រើន។