មន្ត្រីជាន់ខ្ពស់កិច្ចការកោះតៃវ៉ាន់របស់ប្រទេសចិនដីគោក កាលពីថ្ងៃពុធ (ទី៣០ ខែសីហា) បាននិយាយថា តំបន់តៃវ៉ាន់ឥឡូវនេះ កំពុងប្រឈមជាមួយនឹងជម្រើសដ៏សំខាន់មួយ រវាងសន្តិភាព និងសង្គ្រាម ហើយនិងរវាងវិបុលភាព និងឱនភាព។

លោក Song Tao ( សុង ថាវ) ដែលមានតួនាទីទាំងជាប្រធានការិយាល័យការងារកោះតៃវ៉ាន់នៃគណៈកម្មាធិការមជ្ឈិមបក្សកុម្មុយនីស្តចិន និងការិយាល័យកិច្ចការកោះតៃវ៉ាន់នៃក្រុមប្រឹក្សារដ្ឋ បានធ្វើការកត់សម្គាល់ អំឡុងជួបជាមួយលោក Andrew Hsia អនុប្រធានគណបក្ស Kuomintang (KMT) ចិន នៅទីក្រុង Yuncheng ខេត្ត Shanxi ភាគពាយ័ព្យនៃប្រទេសចិន។

លោក Song បាននិយាយថា បច្ចុប្បន្ននេះ កងកម្លាំងបំបែកខ្លួន «ឯករាជ្យតៃវ៉ាន់» កំពុងឃុបឃិតជាមួយកងកម្លាំងខាងក្រៅ ដើម្បីធ្វើសកម្មភាពបង្កហេតុ ដែលរៀបចំឡើង ដើម្បីបំបែកប្រទេស ដែលប៉ះពាល់ដល់ផលប្រយោជន៍របស់ជនរួមជាតិតៃវ៉ាន់ និងបំផ្លាញសន្តិភាព និងស្ថិរភាពនៅទូទាំងច្រកសមុទ្រតៃវ៉ាន់។

លោក Song បាននិយាយថា ប្រទេសចិនដីគោក នឹងធ្វើការជាមួយគណបក្ស KMT និងគណបក្សនយោបាយពាក់ព័ន្ធផ្សេងទៀត បណ្ដាអង្គការ និងប្រជាជនមកពីគ្រប់មជ្ឈដ្ឋាន នៅលើកោះនេះ ផ្អែកលើមូលដ្ឋាននយោបាយរួមនៃការប្រកាន់ខ្ជាប់នូវឯករាជ្យភាពឆ្នាំ១៩៩២ ហើយប្រឆាំងនឹង «ឯករាជ្យភាពតៃវ៉ាន់» ដើម្បីនាំយកទំនាក់ទំនងឆ្លងកាត់ច្រកសមុទ្រត្រឡប់មកកាន់ផ្លូវដ៏ត្រឹមត្រូវវិញ ដើម្បឲ្យមានការអភិវឌ្ឍដោយសន្តិភាព និងរួមចំណែកដល់ការស្តារប្រទេសជាតិឡើងវិញ៕