យោងតាមការអះអាងរបស់ក្រុមអ្នកផលិតរបស់វា បានឲ្យដឹងថា រូបយន្តមានជើង ៤ អាចមើលឃើញអ្វីៗជុំវិញខ្លួនវានោះ ចុងក្រោយនឹងអាចជំនួសសុនខនាំផ្លូវដ៏ទុកចិត្តសម្រាប់មនុស្សពិការភ្នែក។

ក្រុមអ្នកស្រាវជ្រាវមកពី ETH Zurichដែលជាវិទ្យាស្ថានបច្ចេកវិទ្យាសហព័ន្ធស្វីស កំពុងប្រើប្រាស់សុនខរូបយន្តអាចរកទិញបាន ដើម្បីធ្វើតេស្តសមត្ថភាពរបស់វា ក្នុងការផលិត Sensor និង Software ធ្វើឲ្យសុនខរូបយន្តធ្វើដំណើរក្នុងពិភពពិតប្រាកដ និងនាំផ្លូវមនុស្សពិការភ្នែក ឬជនពិការភ្នែកដោយសុវត្ថិភាព ។

លោក Davide Plozza គឺជានិស្សិតថ្នាក់បណ្ឌិត និយាយប្រាប់ទីភ្នាក់ងារព័ត៌មានរ៉យទ័រថា បច្ចុប្បន្នខ្ញុំកំពុងធ្វើការលើគម្រោងសុនខរូបយន្តនេះ ដែលមានសុនខរូបយន្តនាំផ្លូវ ជួយនាំផ្លូវមនុស្សពិការភ្នែកធ្វើដំណើរដោយសុវត្ថិភាព ហើយនិងជំនួសមុខងារសុនខនាំផ្លូវពិតប្រាកដតាមទំនៀមទម្លាប់ ។

លោកបន្តថា សម្រាប់មនុស្សមួយចំនួន ពួកគេនៅមានជម្រើសល្អ ប៉ុន្តែពួកគេត្រូវការចំណាយច្រើនលើការហ្វឹកហាត់ ហើយមិនមែនមនុស្សទាំងអស់ទេ ដែលចង់បានសុនខពិតប្រាកដ ។

លោក Plozza និយាយថា វាមិនដូចគ្នានឹងសុនខនាំផ្លូវពិតប្រាកដទេ សុនខរូបយន្តនេះ អាចបញ្ចូលកម្មវិធី ដើម្បីឲ្យវាបំពេញការងារច្បាស់លាស់ នៅក្នុងបរិស្ថានដែលវាពុំធ្លាប់ដែលមើលឃើញកាលពីមុន ។ វាអាចបង្កើតផែនទីនៅហ្នឹងកន្លែង ហើយបន្ទាប់មកអាចសម្រេចចិត្តថាតើផ្លូវមួយណាគឺជាជម្រើសល្អបំផុតដើម្បីឆាប់ទៅដល់គោលដៅ៕