ក្រុមបាតុករសិទ្ធិជនអន្តោប្រវេសន៍ បានចេញធ្វើបាតុកម្មកាលពីថ្ងៃសុក្រ ក្នុងការឆ្លើយតបទៅនឹងឧបទ្ទវហេតុបាញ់ប្រហារមួយនៅព្រំដែន និងដើម្បីអំពាវនាវប្រឆាំងប្រតិបត្តិការ «Operation Lone Star» របស់រដ្ឋាភិបាលរដ្ឋតិចសាស់ ក្នុងគោលបំណងទប់ស្កាត់ការធ្វើអន្តោប្រវេសន៍ដែលគ្មានឯកសារ។ ដោយត្រូវបានសម្របសម្រួលដោយបណ្តាញព្រំដែនសម្រាប់សិទ្ធិមនុស្ស(BNHR) សកម្មភាពនៅតាមព្រំដែន បានកើតឡើងនៅទីក្រុង El Paso រដ្ឋតិចសាស់ ជាកន្លែងដែលក្រុមបាតុករបានមកប្រមូលផ្តុំគ្នាប្រឆាំងប្រតិបត្តិការ «Operation Lone Star» របស់អភិបាលរដ្ឋ លោក Greg Abbott និងគោលនយោបាយប្រឆាំងជនអន្តោប្រវេសន៍ផ្សេងទៀតដោយមានកាន់ផ្ទាំងប្រកាស និងស្រែកពាក្យផ្សេងៗ។

ការតវ៉ានេះ ត្រូវបានបញ្ឆេះឡើងដោយឧបទ្ទវហេតុមួយកាលពីថ្ងៃសៅរ៍ ទី២៦ ខែសីហា ដែលបុរសជនជាតិម៉ិកស៊ិកម្នាក់ បានរងរបួសដោយការបាញ់កាំភ្លើងនៅមាត់ទន្លេ Rio Bravo ក្នុងទីក្រុង Ciudad Juarez នៅព្រំដែនប្រទេសម៉ិកស៊ិកដែលតាមការចោទប្រកាន់ដោយទាហានម្នាក់ត្រូវបានដាក់ពង្រាយជាផ្នែកនៃប្រតិបត្តិការ «Operation Lone Star» ដែលហេតុការណ៍នេះកំពុងស្ថិតក្រោមការស៊ើបអង្កេត។

លោក Abbott កាលពីឆ្នាំ ២០២១ បានចាប់ផ្តើមកម្មវិធីមួយដែលលោកដាក់ឈ្មោះថា «Operation Lone Star» ក្នុងគោលបំណងទប់ស្កាត់ការធ្វើអន្តោប្រវេសន៍ដែលគ្មានឯកសារ រួមទាំងយុទ្ធនាការដឹកជញ្ជូនជនអន្តោប្រវេសន៍ទៅកាន់ទីក្រុងដឹកនាំដោយលទ្ធិប្រជាធិបតេយ្យនៅភាគខាងជើង និងការដាក់ពង្រាយកងឆ្មាំជាតិរាប់ពាន់នាក់។