មន្ទីរពេទ្យគន្ធបុប្ផាភ្នំពេញ បានប្រកាសថា ខ្លួនបានជួយសង្រ្គោះក្មេងស្រីម្នាក់មានអាយុ ១៥ឆ្នាំ ឲ្យរួចផុត ពីជំងឺរលាកសាច់បំពង់ក ដែលជំងឺនេះមានលក្ខណៈស្រួចស្រាវ ហើយក៏​ជា​ករណី​ជំងឺ​ដ៏​កម្រ​បំផុត ដោយ មិនធ្លាប់បានជួបផងដែរ។

 យោង​តាមហ្វេសបុក ដែលមានឈ្មោះថា Dr. Beat Richner បានបញ្ជាក់ថា ក្មេងស្រី​អាយុ១៥​ឆ្នាំ​នេះ មានជំងឺរលាកសាច់បំពង់ក (Tonsils -Amygdales) ស្រួច​ស្រាវ​ប្រភេទ​រលាក​ចេញ​ភ្នាស​ខ្ទុះ​ស្ទះ​បំពង់ខ្យល់ និងវិវត្តទៅជារលាកសួតនិងខ្សោយសាច់ដុំសន្ទះទ្រូង មិនអាចដកដង្ហើមបាន ។ ជំងឺ​ប្រភេទស្មុគ្រស្មាញបែបនេះ ជាករណីដ៏កម្របំផុត ប៉ុន្តែទោះជាយ៉ាងណាក្មួយស្រី ត្រូវ​បាន​ជួយ​សង្រ្គោះ​ជីវិតនៅផ្នែកសង្រ្គោះបន្ទាន់គន្ធបុប្ផាភ្នំពេញ អស់រយ:ពេល២១ថ្ងៃ ដោយជំនួយ​ម៉ាស៊ីន​សប់​ដង្ហើម ១៦ថ្ងៃ ហើយថ្ងៃ៤ ខែកញ្ញានេះបានជាសះស្បើយ ត្រឡប់ទៅផ្ទះវិញ ដោយ​ស្នាម​ញញឹម​ជាមួយឪពុកម្តាយនាងផងដែរ។

តាមរយៈហ្វេសបុកខាងលើនេះ មន្ទីរពេទ្យគន្ធបុប្ផាក៏បានអរគុណគ្រួសារក្មួយស្រី ដែល​បាន​ចូល​រួម បរិច្ចាគថវិកាចំនួន២៥០០ដុល្លារ ដល់មន្ទីរពេទ្យគន្ធបុប្ផា អរគុណគន្ធបុប្ផារាល់ការព្យាបាល ទាំងអស់ គឺឥតគិតថ្លៃ សម្រាប់គ្រប់ៗគ្នា ដោយគ្មានការរើសអើង ហើយ​ក៏​បាន​អរគុណ​មូល​និធិ​គន្ធបុប្ផា​ស្វីស និងមូលនិធិគន្ធបុប្ផាកម្ពុជា និងអរគុណចំពោះសប្បុរសជនគ្រប់ៗរូប ដែលតែង​តែ​គាំ​ទ្រ​ដល់ដំណើរការមន្ទីរពេទ្យគន្ធបុប្ផានាពេលកន្លងមកផងដែរ។

បើតាមរយៈហ្វេសបុកដែលមានឈ្មោះថា Dr. Beat Richnerដដែលនេះក៏បានឲ្យដឹងផងដែរថា នា​ខែ​សីហា ឆ្នាំ២០២៣កន្លងទៅនេះ មានកុមារឈឺចំនួន៨៥៨០៦នាក់ ត្រូវបាន​ពិនិត្យ​ព្យាបាល​នៅ​ក្នុង​ផ្នែក​ពិគ្រោះជំងឺក្រៅ ហើយកុមារមានជម្ងឺធ្ងន់ៗចំនួន១៧៦៦៥នាក់ផងដែរ។ ដោយឡែក​កុមារ​ដែល​មាន ជំងឺគ្រុនឈាមចំនួន២៩១២នាក់ ខណៈកុមារត្រូវការ​វះកាត់​មាន​ចំនួន​២២៩៥​នាក់៕ អត្ថបទ៖ បាន ចក់