​បាល់ទាត់៖ ​ក្រុមបាល់ទាត់​អេ​ស្ប៉ា​ញ Villarreal បាន​ក្លាយ​ជា​ជើងឯក​ពានរង្វាន់ UEFA Europa League ជា​លើកដំបូង​ក្នុងប្រវត្តិសាស្ត្រ​ក្លិប ​បន្ទាប់ពី​ការប្រកួត​វគ្គ​ផ្ដាច់ព្រ័ត្រ​ដ៏​តានតឹង​យកឈ្នះ Manchester United ដោយ​បាល់ ១១​ម៉ែត្រ​គ្រាប់​ទី១១ ចុងក្រោយ​ដែល​ទាត់​ដោយ​អ្នកចាំទី​ក្រុម​ទាំងសងខាង​។

​​នេះ​ជា​ការ​បង្ហាញខ្លួន​លើកដំបូង​នៅ​វគ្គ​ផ្តាច់ព្រ័ត្រ​សំរាប់ Villarreal នៅ​ក្រប​ខណ្ឌ​អឺរ៉ុប ​តែ​មិន​មែន​ជា​លើកដំបូង​សំរាប់​អ្នកចាត់ការ Unai Emery ឡើយ​ដែល​ធ្លាប់​ដឹកនាំ Sevilla លើក​ពាន Europa League ៣សម័យ​ជាប់​គ្នា​។ ​​Gerard Moreno គឺជា​អ្នកបើក​ការនាំ​មុខមុន​ឲ្យ Villarreal នៅ​នាទី​ទី២៩ ដែលជា​គ្រាប់​ទី៣០ របស់គេ​ក្នុង​រដូវ​កាល​នេះ មុនពេល​ដែល Edinson Cavani តាម​ស្មើ​វិញ​នៅ​វគ្គ​ទី២ នាទី​ទី៥៩ ដែលជា​គ្រាប់​ទី១៦ របស់គេ​ក្នុងការ​បង្ហាញខ្លួន ១១ប្រកួត​ចុងក្រោយ ហើយ​ក្រុម​ទាំងពីរ​ក៏​រក្សា​លទ្ធផល ១-១ រហូត​ចប់​ការប្រកួត និង​បន្ថែម ១៥នាទី ២ដង​នៅតែ​ស្មើគ្នា​។ ​​ឈានដល់​វគ្គ ១១ម៉ែត្រ​កាត់សេចក្តី​ការប្រកួត​នៅតែ​តានតឹង ​បន្ទាប់ពី​កីឡាករ ១០នាក់​ទាំងសងខាង​សុទ្ធតែ​ស៊ុត​បានសំរេច ហើយក៏​សំរេច​ចុងក្រោយ​ដោយ​អ្នកចាំទី​។ ​​អ្នកចាំទី Villarreal, Gemorino Rulli ស៊ុត​មុន​បានសំរេច​តែ​អ្នកចាំទី Manchester United, David de Gea ធ្វើ​មិនបាន​សំរេច​ឡើយ​ដោយ Rulli សង្គ្រោះ​បានធ្វើឲ្យ Villarreal ស្គាល់​ពាន UEFA Europa League លើកដំបូង​។

​​អតីត​អ្នកចាត់ការ Arsenal លោក Unai Emery នៅពេលនេះ​បាន​លើក​ពាន Europa League សរុប ៤លើក​ហើយ​ក្នុង​អាជីព​។ ​​ក្រោយ​ចប់​ការប្រកួត​អ្នកចាត់ការ Manchester United, Ole Gunnar Solskjaer និយាយថា​ ក្រុម​មួយ​ដែល​បញ្ចប់​រដូវ​កាល​មិន​ឈ្នះ​ពាន​សោះ មិនអាច​ហៅថា​ជោគជ័យ​បានឡើយ តែ​បរាជ័យ​នៅ​វគ្គ​ផ្តាច់ព្រ័ត្រ​ មិនមែនជា​ការបាត់បង់​អ្វី​គ្រប់យ៉ាង​នោះទេ​។ ​​បរាជ័យ​នេះដែរ​ធ្វើឲ្យ Manchester United មិន​ឈ្នះ​ពាន​អ្វី​សោះ​តាំងពី​ឆ្នាំ២០១៧ ដែល​ឈ្នះ​ជើងឯក Europa League ក្រោម​ការដឹកនាំ​របស់ Jose Mourinho ខណៈ Ole Gunnar Solskjaer នៅតែ​បន្ត​ស្វែងរក​ពាន​ដំបូង​ក្នុង​អាជីព​ជា​អ្នកចាត់ការ​៕

​អត្ថបទ​៖​នាង សុភា​វុ​ធ