ស្រីលង្កា៖ ក្រុមមន្ត្រីនិយាយថា អគ្គិភ័យមួយកើតលើនាវាផ្ទុកកុងតេន័រ ដែលដឹកសារធាតុគីមីបន្តឆាបឆេះដល់ថ្ងៃទី៦ នៅក្នុងប្រទេសស្រីលង្កាកាលពីថ្ងៃពុធ ហើយប្រទេសឥណ្ឌាបានបញ្ជូននាវាជាច្រើនគ្រឿងជួយពន្លត់អណ្ដាតភ្លើង។
លោក Indika de Silva អ្នកនាំពាក្យអង្គភាពកងទ័ពជើងទឹកបាននិយាយថា ទូកសណ្ដោងចំនួន ៥គ្រឿងកំពុងជួយពន្លត់ភ្លើង ដោយមានជំនួយពីនាវាកងទ័ពជើងទឹកស្រីលង្កា ដែលបានបោះយុថ្កាចតនៅក្បែរនោះ។ អគ្គិភ័យបានរាលដាលដល់ជាន់កណ្ដាល ដែលរួមទាំងបន្ទប់បញ្ជាការបើកបរផងដែរ។ ក្រុមសមាជិកនាវិក បុគ្គលិកសង្គ្រោះ និងក្រុមអ្នកពន្លត់អគ្គិភ័យត្រូវបានជម្លៀសចេញពីនាវានេះកាលពីថ្ងៃអង្គារ បន្ទាប់ពីការផ្ទុះ។ ទូផ្ទុកទំនិញមួយចំនួនបានធ្លាក់ចូលក្នុងសមុទ្រ។ កងទ័ពជើងទឹកជឿថា អគ្គិភ័យនេះត្រូវបានបង្កឡើងដោយសារធាតុគីមី ដែលត្រូវបានផ្ទុកនៅលើនាវាដែលបំពាក់ទង់ជាតិសិង្ហបុរី។
នាវានេះកំពុងដឹកទូកុងតេន័រចំនួន ១,៤៨៦ទូ រួមមានអាស៊ីតនីទ្រីចចំនួន ២៥តោន និងសារធាតុគីមីផ្សេងទៀតនៅកំពង់ផែហាហ្ស៊ីរ៉ា ក្នុងប្រទេសឥណ្ឌាកាលពីថ្ងៃទី១៥ ខែឧសភា។ សមាជិកក្រុមនាវិកចំនួន ២៥នាក់របស់នាវានេះ រួមមានជនជាតិហ្វីលីពីន ចិន ឥណ្ឌា និងរុស្ស៊ី៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
