ខ្សែប្រយុទ្ធស្លាប Arsenal, Bukayo Saka ត្រូវបានប្រកាសជាកីឡាករឆ្នើមបំផុតរបស់អង់គ្លេស ២ ឆ្នាំជាប់គ្នា។

កីឡាករវ័យ ២២ ឆ្នាំរូបនេះ ទទួលបានសំលេងគាំទ្រច្រើនលើសលុបដើម្បីទទួលបានតំណែងនេះ ២ រដូវកាលជាប់គ្នា។

ខ្សែបម្រើ Real Madrid, Jude Bellingham ឈរលេខ ២ ខណៈដែលប្រធានក្រុមជម្រើសជាតិ អ្នកស៊ុតបញ្ចូលទីច្រើនជាងគេឱ្យអង់គ្លេស Harry Kane ឈរលេខ ៣។

Bukayo Saka បានស៊ុតបញ្ចូលទី ៧ គ្រាប់ក្នុងការបង្ហាញខ្លួន ១០ លើកឱ្យអង់គ្លេស បូករួមទាំង Hat-Trick ដំបូងក្នុងអាជីពក្នុងជ័យជំនះរបស់អង់គ្លេស ៧-០ លើ ម៉ាសេដ្វាន់ខាងជើងនៅ Old Trafford កាលពីខែមិថុនាក្នុងការប្រកួតជំរុះ Euro 2024។

កាលពីនៅ World Cup 2022 ប្រទេសកាតា Saka រកបាន ៣ គ្រាប់​ខណៈ​អង់គ្លេស​ឡើង​ដល់​វគ្គ​ ៨ ក្រុមចុងក្រោយចាញ់បារាំង។

អង់គ្លេសនឹងត្រូវជួបអ៊ុយក្រែនថ្ងៃសៅរ៍នេះវគ្គជម្រុះ Euro 2024 មុន​បន្ត​ជួប​ជាមួយ​ស្កុត​ឡេន​នៅ​ថ្ងៃ​អង្គារ​លក្ខណៈមិត្តភាព៕ អត្ថបទ៖នាង សុភាវុធ