ឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល និងថ្នាក់ដឹកនាំក្រសួងសុខាភិបាល បាន​អញ្ជើញចុះសួរសុខទុក្ខ សំណេះសំណាល និងថ្លែងអំណរគុណដល់ថ្នាក់ដឹកនាំ និងមន្រ្តី​រាជការ​ បុគ្គលិកទាំងអស់ នៅវិទ្យាស្ថានជាតិសុខភាពសាធារណៈ,នៅថ្ងៃទី៦ ខែកញ្ញា ឆ្នាំ​២០២៣​។

ឯកឧត្តមសាស្រ្តាចារ្យ ឈាង រ៉ា បានថ្លែងអំណរគុណ និងកោតសរសើរដល់ថ្នាក់ដឹកនាំ មន្រ្តី​រាជការ​ទាំងអស់ នៃវិទ្យាស្ថានជាតិសុខភាពសាធារណៈ ដែលតែង​តែ​យក​ចិត្ត​ទុក​ដាក់​ចូល​រួម​រាល់​ការ​លើក​កម្ពស់សុខភាពសាធារណៈ ផ្នែកខាងមន្ទីរពិសោធន៍ និងការបណ្តុះ​បណ្តាល​សុខភាព​សាធារណៈ​ ជាពិសេសក្នុងវគ្គបណ្តុះបណ្តាលភាពជាអ្នកដឹកនាំ ថ្នាក់មន្ទីរសុខាភិបាលរាជធានី-ខេត្ត ​មន្ទីរពេទ្យបង្អែកខេត្ត-ស្រុក ការិយាល័យសុខាភិបាលស្រុកប្រតិបត្តិ និង​មណ្ឌល​សុខភាព​ទូទាំង​ប្រទេស​។

ឯកឧត្តមសាស្ត្រាចារ្យរដ្ឋមន្រ្តី ក៏បានវាយតម្លៃខ្ពស់ដល់ថ្នាក់ដឹកនាំ និងមន្រ្តីរាជការ នៃ​វិទ្យាស្ថាន​ជាតិ​សុខ​ភាពសាធារណៈ ដែលមានតួនាទីយ៉ាងសកម្ម ក្នុងការឆ្លើយតបបន្ទាន់ ទាំងផ្នែក​មន្ទីរ​ពិសោធន៍ អង្កេតតាមដាន និងស្រាវជ្រាវ ក្នុងអំឡុងការឆ្លងរាលដាលនៃមេរោគកូវីដ-១៩ នៅ​ក្នុង​សហគមន៍ ប្រកបដោយស្មារតីទទួលខុសត្រូវខ្ពស់ដែលបានលះបង់ ទាំងកម្លាំងកាយ កម្លាំងចិត្ត និង​ពេល​វេលា ដើម្បីសុខភាពប្រជាជនកម្ពុជា។

ជា​ចុងក្រោយ ឯកឧត្តមសាស្រ្តាចារ្យរដ្ឋមន្រ្តី បានស្នើឱ្យថ្នាក់ដឹកនាំ និងមន្រ្តីរាជការ បុគ្គលិក​ទាំង​អស់ ​ត្រូវចេះស្រឡាញ់រាប់អានគ្នា ពង្រឹងវិន័យ សាមគ្គី និងឯកភាពផ្ទៃក្នុង ដើម្បីនាំ​មក​នូវ​ការ​រីក​ចំរើន​ថែម​ទៀត​នៅ​ក្នុងអង្គភាព និងសូមជូនពរថ្នាក់ដឹកនាំ និងមន្រ្តីរាជការទាំងអស់ ជួបប្រទះ​តែ​ពុទ្ធពរ​ទាំង​បួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕ អត្ថបទ រដ្ឋា