ម៉ាឡេស៊ី ៖ ប្រទេសម៉ាឡេស៊ី ចង់ឲ្យអតីតធនាគារិករបស់ធនាគារ Goldman Sachs ដែលជាប់ទោសកាលពីឆ្នាំមុន នៅទីក្រុងញូវយ៉ក សហរដ្ឋអាមេរិក ពីបទសមគំនិតដកប្រាប់ដោយខុសច្បាប់រាប់ពាន់លានដុល្លារពីមូលនិធិទ្រព្យសម្បត្តិអធិបតេយ្យរបស់ក្រុមហ៊ុន 1MDB របស់ខ្លួន ឲ្យត្រឡប់ទៅប្រទេសវិញ មុនពេលចាប់ផ្តើមដំណើរការកាត់ទោសឲ្យជាប់ពន្ធនាគាររយៈពេល ១០ឆ្នាំ នៅសហរដ្ឋអាមេរិក។

ចៅក្រមសហព័ន្ធប្រចាំតំបន់របស់អាមេរិក លោកស្រី Margo Brodie នៅទីសង្កាត់ Brooklyn កាលពីថ្ងៃអង្គារ (ទី៥ ខែកញ្ញា) បានពន្យារពេលកាលបរិច្ឆេទចូលខ្លួនរបស់លោក Roger Ng ដែលគ្រោងធ្វើឡើងនៅថ្ងៃទី៦ ខែកញ្ញា រយៈពេលមួយខែ គឺដល់ថ្ងៃទី៦ ខែតុលា បន្ទាប់ពីរដ្ឋអាជ្ញាសហព័ន្ធ បាននិយាយថា ខ្លួនត្រូវការពេលវេលាបន្ថែមទៀត ដើម្បីពិភាក្សាជាមួយទីក្រុងគូឡាឡាំពួអំពីការអនុញ្ញាតឲ្យជនជាប់ចោទឡើងសវនាការ ជុំវិញបទចោទប្រកាន់ផ្សេងៗ នៅទីនោះ។

រដ្ឋអាជ្ញាបានឲ្យដឹងថា មេធាវីរបស់លោក Roger Ng( រ៉ូជើ ណឹង) បានយល់ព្រមចំពោះការពន្យារពេលមួយខែនេះ។ ប៉ុន្តេលោក Marc Agnifilo ដែលម្នាក់ក្នុងចំណោមមេធាវីជាច្រើនរូប បានបដិសេធមិនធ្វើអត្ថាធិប្បាយអ្វីឡើយ។

សូមបញ្ជាក់ថា សំណុំរឿងនេះកើតចេញពីមូលបត្របំណុលប្រហែល ៦,៥ពាន់លានដុល្លារ ដែលធនាគារ Goldman បានជួយក្រុមហ៊ុន 1MDB លក់ក្នុងឆ្នាំ២០១២ និងឆ្នាំ២០១៣។ រដ្ឋអាជ្ញាអាមេរិក បាននិយាយថា ទឹកប្រាក់ចំនួន ៤,៥ពាន់លានដុល្លារអាមេរិកនៃចំនួនប្រាក់នោះ ត្រូវបានកេងបន្លំដោយមន្ត្រី ធនាគារិក និងសហការីរបស់ពួកគេ។

ក្នុងសវនាការនៅតុលាការកាលពីខែមុន រដ្ឋអាជ្ញាសហរដ្ឋអាមេរិកលោក Drew Rolle បាននិយាយថា ជនជាប់ចោទ លោក Roger Ng វ័យ ៥១ឆ្នាំ ដែលត្រូវបានកាត់ទោស កាលពីខែមីនា ឆ្នាំ២០២២ ពីបទល្មើសស៊ីសំណូក និងសមគំនិតសម្អាតលុយ អាចត្រូវបានបញ្ជូនទៅកាន់ប្រទេសម៉ាឡេស៊ីវិញ ដើម្បីចូលរួមសវនាការនៅទីនោះ នៅពេលដែលរូបគេកំពុងស្ថិតក្នុងការឃុំឃាំងរបស់សហរដ្ឋអាមេរិក៕