ជប៉ុន ៖ មនុស្សប្រមាណ ១៥០ នាក់នៅក្នុងប្រទេសជប៉ុន រួមមានទាំងកម្មករនេសាទនៅក្នុងខេត្ត Fukushima បានដាក់ពាក្យបណ្តឹងកាលពីថ្ងៃសុក្រ ដើម្បីឲ្យបញ្ឈប់ការបញ្ចេញទឹកសំណល់មានសារធាតុពុលនុយក្លេអ៊ែរពីរោងចក្រថាមពលនុយក្លេអ៊ែរ Fukushima Daiichi ដែលមិនដំណើការ ចូលទៅក្នុងមហាសមុទ្រ។

នៅក្នុងបណ្តឹង ដែលប្តឹងរដ្ឋាភិបាលជប៉ុន និងប្រតិបត្តិកររោងចក្រក្រុមហ៊ុនថាមពលអគ្គិសនីទីក្រុងតូក្យូ (TEPCO) ដើមបណ្តឹងបានអះអាងថាការបញ្ចេញទឹកសំណល់បង្ហូរទៅមហាសមុទ្រ រំលោភលើសិទ្ធិនេសាទរបស់ពួកគេ និងគំរាមកំហែងដល់សិទ្ធិអ្នកប្រើប្រាស់ក្នុងការរស់នៅដោយស្ងប់ស្ងាត់។

រដ្ឋាភិបាលជប៉ុន និងក្រុមហ៊ុន TEPCO ទាំងពីរនេះបានសន្យាជាលាយលក្ខណ៍អក្សរចំពោះសមាគមសហករណ៍ជលផលក្នុងខេត្ត Fukushima ថាពួកគេនឹងមិនបង្ហូរចោលទឹកសំណល់មានសារធាតុពុលនុយក្លេអ៊ែរដោយគ្មានការយល់ដឹងពីភាគីពាក់ព័ន្ធនោះទេ។ 

ទោះយ៉ាងណា ខណៈការសន្យានេះត្រូវបានបដិសេធ កម្មករជលផលកំពុងស្វែងរកមធ្យោបាយផ្លូវច្បាប់ ដើម្បីបញ្ឈប់ការបញ្ចេញទឹកសំណល់វិទ្យុសកម្ម។ ទោះបីជាមានការប្រឆាំងយ៉ាងខ្លាំងពីក្នុងប្រទេស និងក្រៅប្រទេសក៏ដោយ ក៏ប្រទេសជប៉ុនបានចាប់ផ្តើមបញ្ចេញទឹកសំណល់វិទ្យុសកម្មពីរោងចក្រ Fukushima ចូលទៅក្នុងមហាសមុទ្រប៉ាស៊ីហ្វិកកាលពីថ្ងៃទី ២៤ ខែសីហា បង្កឱ្យមានការព្រួយបារម្ភក្នុងចំណោមអ្នកនេសាទជាច្រើនអំពីជីវភាពរស់នៅរបស់ពួកគេ។