កុងហ្គោ៖ នៅថ្ងៃព្រហស្បតិ៍នេះ ប្រជាពលរដ្ឋរាប់ម៉ឺននាក់ បានជម្លៀសខ្លួនចេញពីទីក្រុងហ្គោម៉ា ស្ថិតនៅភាគខាងកើតសាធារណរដ្ឋកុងហ្គោ ដោយសារក្តីកង្វល់ពីការផ្ទុះម្តងទៀតរបស់ភ្នំភ្លើងនីអ៊ីរ៉ាហ្គោនហ្គោ។
អភិបាលខេត្តគីវូខាងជើង បានបញ្ជាក់ឲ្យមានការជម្លៀសពលរដ្ឋចេញពីតំបន់ចំនួន១០ ក្នុងចំណោម១៨តំបន់ នៅជុំវិញភ្នំភ្លើងដោយលោកបានលើកឡើងថា ការផ្ទុះភ្នំភ្លើងម្តងទៀត អាចកើតឡើងនៅពេលណាមួយ។
ទីក្រុងហ្គោម៉ាបច្ចុប្បន្ន កំពុងស្ថិតក្នុងការគំរាមកំហែងខ្លាំង ក្រោយពីមានសេចក្តីរាយការណ៍ថា ភ្នំភ្លើងកំពុងកម្រើកនៅតំបន់ជាយៗ និងក្នុងបឹងគីវូ។
ការផ្ទុះក្រោមបាតបឹងគីវូ អាចនាំឲ្យមានផលវិបាកផងដែរ ដោយសារការផ្ទុះឧស្ម័ននៅក្នុងបឹងនឹងធ្វើឲ្យបំផ្លិចបំផ្លាញតំបន់មួយចំនួននៅក្នុងទីក្រុងហ្គោម៉ា និងទីក្រុងហ្គសេនយី ស្ថិតក្នុងប្រទេសជិតខាងរ្វ៉ាន់ដា។
ប្រជាពលរដ្ឋត្រូវបានគេណែនាំឲ្យយករបស់របរទៅខ្លះ ដោយសារពួកគេមិនអាចវិលត្រឡប់មកវិញបានឡើយ រហូតដល់មានការជូនដំណឹងពីក្រុមអាជ្ញាធរ ហើយរថយន្តនឹងផ្តល់ជូន ដើម្បីជួយជម្លៀសពួកគេ។
ក្រុមមន្ត្រី បាននិយាយថា ដោយសារមានការប្រកាសអាសន្នតិចតួច ភ្នំភ្លើងនីអ៊ីរ៉ាហ្គោនហ្គោ បានព្រួសភ្លើងកាលពីយប់ថ្ងៃសៅរ៍ ហើយកម្អែបានហូរមកស្រោចលើភូមិដ្ឋានប្រជាពលរដ្ឋ បំផ្លិចបំផ្លាញផ្ទះសម្បែងជាង ៥០០ខ្នង និងសម្លាប់មនុស្សជាង ៣២នាក់ ក្នុងរយៈពេលជាច្រើនថ្ងៃកន្លងមកនេះ ។
សូមបញ្ជាក់ថា ភ្នំភ្លើងនីអ៊ីរ៉ាហ្គោនហ្គោ បានផ្ទុះចុងក្រោយកាលពីឆ្នាំ ២០០២ ដោយបានសម្លាប់មនុស្សរាប់រយនាក់ ។ ភ្នំភ្លើងនេះដែរ ធ្លាប់ផ្ទុះផងដែរក្នុងឆ្នាំ ១៩៧៧ បណ្តាលឲ្យមនុស្សជាង ៦០០នាក់ បាត់បង់អាយុជីវិត៕ អត្ថបទ៖ សារ៉ាត់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
