ឧត្ដរមានជ័យ៖ រដ្ឋបាលខេត្តឧត្ដរមានជ័យ បានប្រកាសថា មានពលករខ្មែរ ២នាក់ទៀត ត្រូវបានរកឃើញឆ្លងមេរោគកូវីដ-១៩ ហើយក៏មានអ្នកជំងឺកូវីដ-១៩នាក់ទៀត បានជាសះស្បើយផងដែរ។
ក្នុងសេចក្ដីប្រកាសព័ត៌មាននៅថ្ងៃនេះ រដ្ឋបាលខេត្តឧត្ដរមានជ័យបញ្ជាក់ថា ទារកអាយុទើប ១ខួប និងស្ត្រីម្នាក់អាយុ ៤០ឆ្នាំ ដែលមានស្រុកកំណើតនៅខេត្តបាត់ដំបងនោះ ត្រូវបានរកឃើញឆ្លងមេរោគកូវីដ-១៩ បន្ទាប់ពីពួកគេវិលត្រឡប់មកពីខេត្តសមុទ្រប្រាកាន ប្រទេសថៃ។
រដ្ឋបាលខេត្តនេះ បញ្ជាក់បន្ថែមថា ទារកអាយុទើប ១ខួប និងម្ដាយរបស់គេ ដែលត្រូវមើលថែទាំកូននោះ ត្រូវបានបញ្ជូនទៅសម្រាកព្យាបាលនៅឯមន្ទីរពេទ្យបង្អែកខេត្ត ខណៈអ្នកជំងឺកូវីដ-១៩ជាស្ត្រីអាយុ ៤០ឆ្នាំនោះ ត្រូវបានបញ្ជូនទៅសម្រាកព្យាបាលនៅឯមណ្ឌលព្យាបាលផ្ទះសំណាកឧត្ដមរដ្ឋា។
ទន្ទឹមគ្នានេះ អ្នកពាក់ព័ន្ធនឹងអ្នកជំងឺទាំង ២នាក់នេះ ត្រូវបានដាក់ឱ្យនៅដាច់ដោយឡែកនៅឯមណ្ឌលចត្តាឡីស័កស្ថិតក្នុងបរិវេណវិទ្យាល័យតេជោសែន សំរោង។
រដ្ឋបាលខេត្តនេះក៏បានប្រកាសឱ្យដឹងផងដែរថា អ្នកជំងឺកូវីដ-១៩ចំនួន ២នាក់ទៀត មានកុមារីអាយុ ៤ឆ្នាំម្នាក់ និងបុរសម្នាក់អាយុ ៣៥ឆ្នាំ ត្រូវបានព្យាបាលជាសះស្បើយពីជំងឺហើយ។
គិតត្រឹមថ្ងៃនេះ ខេត្តឧត្ដរមានជ័យបានរកឃើញមនុស្ស ៤០នាក់ហើយបានឆ្លងមេរោគកូវីដ-១៩ ក្នុងនោះ ៣៨នាក់គឺជាករណីនាំចូល ខណៈ ២នាក់ទៀតជាករណីពាក់ព័ន្ធនឹងព្រឹត្តិការណ៍សហគមន៍ ២០កុម្ភៈ។
រដ្ឋបាលខេត្តនេះបញ្ជាក់ថា អ្នកជំងឺកូវីដ-១៩ចំនួន ៩នាក់ហើយត្រូវបានព្យាបាលជាសះស្បើយ ខណៈ ២៩នាក់ទៀត កំពុងស្ថិតក្រោមការព្យាបាលបន្តនៅឡើយ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
