ក្រុមបាល់ទាត់ជម្រើសជាតិកម្ពុជា បានយកឈ្នះក្រុមភ្ញៀវម៉ាកាវ ដោយលទ្ធផល ៤-០ ក្នុង​ជំនួប​មិត្ត​ភាព​អន្ដរជាតិ កាលពីរាត្រីថ្ងៃច័ន្ទដើមសប្ដាហ៍នេះ នៅពហុកីឡដ្ឋានជាតិ(ស្ដាតអូឡាំពិក) ។ ជ័យ​ជម្នះនេះដែរ បានចារនូវកំណត់ត្រាថ្មីមួយចំនួន ដូចជា​ការ​យក​ឈ្នះម៉ា​កាវ​ច្រើន​គ្រាប់​លើក​ដំបូង ក្នុងប្រវត្តិជួបគ្នា ៧លើកចុងក្រោយ ហើយក៏ជាជម្នះដំបូង បន្ទាប់ពីលោក Felix Dalmas​ ត្រឡប់​មក​ដឹកនាំក្រុមគោព្រៃវិញផងដែរ ។

ជំនួបដ៏ជក់ចិត្តនេះ ក្រុមគោព្រៃកម្ពុជា បានបើកការនាំមុខ ៣-០ នៅវគ្គទី១ ដែល​ធ្វើ​សម្រេច​ដោយ​កីឡាករ សៀង ចន្ធា ២គ្រាប់ នៅនាទី១៩ និងនាទី២១ ក្រោយទទួល​ការ​បញ្ជូន​បាល់​យ៉ាង​ល្អ​ពី​មិត្ត​រួមក្រុម កាន់ ពិសាល និង ស៊ិន សុផាណាត់ និង ១គ្រាប់ទៀត រក​បាន​ដោយ​ខ្សែ​ការពារ​មក​ពី​ព្រះខ័​នរាជស្វាយរៀង សឿយ វិសាល នៅនាទី៤០ ។ ចូលវគ្គទី២ ទោះបីក្រុមម៉ាកាវ បាន​ផ្លាស់​ប្ដូរ​ប្រព័ន្ធលេងយ៉ាង ក៏មិនអាចទម្លាយសំណាញ់ទីក្រុមគោព្រៃ ផ្ទុយទៅវិញ កម្ពុជា​បាន​បន្ថែម​ ១គ្រាប់ទៀត នៅចុងម៉ោង ដោយកីឡាករ រ៉ឹង ប៊ុនហៀង ដើម្បី​ធានា​ជ័យ​ជម្នះ​របស់​ខ្លួន​តែម្ដង​។

ជាមួយជ័យជម្នះនេះ បានក្លាយជាជ័យជម្នះដែលមានគ្រាប់បាល់ច្រើនជាងគេ ក្នុង​ប្រវត្តិ​ជួប​គ្នា​ចំនួន​ ៧លើកចុងក្រោយ ដែលកម្ពុជា ធ្លាប់ឈ្នះម៉ាកាវ ៤លើក ស្មើ ១លើក និងចាញ់ ១លើក ។ ​និយាយពីប្រវត្តិឈ្នះរបស់ក្រុមគោព្រៃ  កម្ពុជាបានយកឈ្នះម៉ាកាវ ៣-១ ក្នុងជំនួបមិត្តភាព ឆ្នាំ​២០០៨​ មុនបន្ដយកឈ្នះ ២-១ ក្នុងជំនួបមិត្តភាពឆ្នាំ២០០៩ ហើយបន្ដយកឈ្នះ ៣-១ ម្ដង​ទៀត​ ក្នុងជំនួបមិត្តភាព ឆ្នាំ២០១១ គ្រាដែលជ័យជម្នះចុងក្រោយ គឺកម្ពុជា បានយកឈ្នះម៉ាកាវ ៣-០ ក្នុងវគ្គជម្រុះបឋម នៃពានរង្វាន់បាល់ទាត់ពិភពលោក ឆ្នាំ២០១៨ មុនកម្ពុជា បន្ដជ័យជម្នះ ៤-០ លើក្រុមម៉ាកាវ កាលពីយប់មិញ ។



ម្យ៉ាងវិញទៀត នេះក៏ជាជ័យជម្នះលើកដំបូងរបស់ក្រុមជម្រើសជាតិកម្ពុជា(ក្រុមធំ) ក្រោយ​ការ​វិល​ត្រឡប់​មកដឹកនាំក្រុមគោព្រៃជាលើកទី២ ក្នុងនាមគ្រូបង្គោលរបស់លោក Felix Dalmas ​ផង​ដែរ ​បន្ទាប់ពីការប្រកួតដំបូង កាលពីខែមិថុនាកន្លងទៅ ក្រុមជម្រើសជាតិកម្ពុជា បាន​ចាញ់​ក្រុម​ភ្ញៀវ​បង់​ក្លាដែស ដោយលទ្ធផល ១-០ ក្នុងជំនួបមិត្តភាពអន្ដរជាតិ មុនប្រកួតស្មើក្រុមភ្ញៀវហុងកុង ១-១​ កាលពីថ្ងៃទី០៧ ខែកញ្ញាកន្លងទៅ នៅពហុកីឡដ្ឋានជាតិតែមួយគត់ ។

សូមបញ្ជាក់ថា ការប្រកួតមិត្តភាពអន្ដរជាតិ កំឡុង FIFA Day របស់ក្រុមជម្រើសជាតិកម្ពុជា គឺ​ដើម្បី​ត្រៀម​ខ្លួន សម្រាប់ការប្រកួតជម្រុះបឋមពានរង្វាន់បាល់ទាត់ពិភពលោក (2026 FIFA World Cup Asian Qualifiers) ដែលកម្ពុជា ត្រូវជួបក្រុមជម្រើសជាតិប៉ាគីស្ថាន នាខែក្រោយ ពោល​គឺជើងទី១ កម្ពុជា ត្រូវបើកទ្វារផ្ទះទទួលប៉ាគីស្ថាន នាថ្ងៃទី១២ ខែតុលា និងជើងទី២ កម្ពុជា ត្រូវ​ជួបប៉ាគីស្ថាន ក្រៅដីវិញ នាថ្ងៃទី១៧ ខែតុលា ឆ្នាំ២០២៣ ខាងមុខ ៕ អត្ថបទ លី ឈុនឡា