ជប៉ុន ៖ ប្រតិបត្តិកររបស់រោងចក្រថាមពលនុយក្លេអ៊ែរ Fukushima ដែលរងការបំផ្លិចបំផ្លាញ បាននិយាយ កាលពីថ្ងៃចន្ទ (ទី១១ ខែកញ្ញា) ថា ខ្លួនបានបញ្ចប់សព្វគ្រប់ហើយ សម្រាប់ការបញ្ចេញទឹកវិទ្យុសកម្មដំណាក់ដំបូងពីរោងចក្រទៅក្នុងសមុទ្រដោយសុវត្ថិភាព ហើយនឹងត្រួតពិនិត្យ និងសម្អាតឧបករណ៍ មុនពេលចាប់ផ្តើមដំណាក់ទី២ ក្នុងរយៈពេល ២-៣សប្តាហ៍ទៀត។

សូមបញ្ជាក់ថា រោងចក្រ Fukushima Daiichi បានចាប់ផ្តើមបញ្ចេញទឹកសំណល់ ដែលត្រូវបានធ្វើប្រព្រឹត្តិកម្មហើយ និងដែលនៅសល់សារធាតុវិទ្យុសកម្មតិចតួចទៅក្នុងមហាសមុទ្រប៉ាស៊ីហ្វិក កាលពីថ្ងៃទី២៤ ខែសីហា។ ទឹកនេះមានកាន់តែច្រើនឡើងៗ ចាប់តាំងពីរោងចក្រនេះ រងនូវការខូចខាតដោយសារគ្រោះរញ្ជួយដី និងរលកយក្សស៊ូណាមិ ក្នុងឆ្នាំ២០១១ ហើយការចាប់ផ្តើមបង្ហូរទឹកទាំងនេះ គឺជាគោលដៅដ៏សំខាន់មួយ ក្នុងការដកបន្ទុកដែលមិនប្រើប្រាស់ សម្រាប់រោងចក្រនេះ។

ការបញ្ចេញនេះ ដែលត្រូវបានគេរំពឹងថា នឹងបន្តអស់ជាច្រើនទស្សវត្សរ៍ រហូតដល់ការដកបន្ទុកសារធាតុមិនប្រើប្រាស់ ត្រូវបានបញ្ចប់ជាស្ថាពរនោះ ជួបប្រទះនឹងការតវ៉ាប្រឆាំងយ៉ាងខ្លាំងក្លាពីសំណាក់ក្រុមអ្នកនេសាទ និងប្រទេសជិតខាង។ ជាក់ស្ដែង ប្រទេសចិនបានហាមឃាត់ការនាំចូលអាហារសមុទ្រជប៉ុនទាំងអស់ ដើម្បីជាការឆ្លើយតប ដោយធ្វើឲ្យប៉ះពាល់ដល់អ្នកផលិត និងអ្នកនាំចេញ និងជំរុញឲ្យរដ្ឋាភិបាលជប៉ុនប្រមែប្រមូលដាក់ចេញនូវមូលនិធិសង្គ្រោះបន្ទាន់មួយ។ ដូចគ្នាដែរ ក្រុមនានា នៅប្រទេសកូរ៉េខាងត្បូង ក៏បានជំទាស់យ៉ាងខ្លាំង ដោយទាមទារឲ្យជប៉ុនបញ្ឈប់ការបង្ហូរនេះ។

អំឡុងពេលនៃការបញ្ចេញលើកដំបូងរយៈពេល ១៧ថ្ងៃនេះ ប្រតិបត្តិកររោងចក្រ គឺក្រុមហ៊ុនថាមពលអគ្គិសនីតូក្យូ (TEPCO) បាននិយាយថា ខ្លួនបានបញ្ចេញទឹកដែលធ្វើប្រព្រឹត្តិកម្មហើយចំនួន ៧.៨០០តោនចេញពីធុងផ្ទុកចំនួន ១០ធុង។ ទឹកសំណល់វិទ្យុសកម្មប្រហែល ១.៣៤លានតោន ត្រូវបានរក្សាទុកនៅក្នុងធុងប្រហែល ១.០០០ធុង ក្នុងរោងចក្រនេះ៕