ភ្នំពេញ៖ យុវជនខ្មែរចំនួន ៣ក្រុម បានឈ្នះពានរង្វាន់ផលិតវីដេអូខ្លី ក្នុង​កម្មវិធី​ប្រកួត​ប្រជែង​ ស្តីពី​ការ​អប់រំ​ចំណេះដឹងហិរញ្ញវត្ថុ (FECA) ប្រចាំឆ្នាំ២០២៣ ក្រោមប្រធានបទ “ឈ្វេង​យល់​ពី​បច្ចេក​វិទ្យា​ហិរញ្ញ​វត្ថុ” ក្នុង​ចំណោមអ្នកចូលរួមប្រកួតសរុបចំនួន ៣៨ក្រុម។

លោក ទិត្យ កំរង ស្ថាបនិកក្រុមហ៊ុនឬទ្ធិពល និងអេបកត់លុយ និង​ជា​ស្ថាបនិក​កម្ម​វិធី​ពាន​រង្វាន់​ប្រកួត​ប្រជែង​ ស្តីពីការអប់រំចំណេះដឹងហិរញ្ញវត្ថុ នៅក្នុងពិធីប្រគល់ពានរង្វាន់ កាល​ពី​ល្ងាច​ថ្ងៃ​ទី​១២ ​ខែ​កញ្ញា ឆ្នាំ២០២៣ បានឲ្យដឹងថា នេះជាលើកទី៣ហើយ ដែល​លោក​រៀបចំ​កម្ម​វិធី​នេះ​ឡើង​ ក្នុង​គោលបំ​ណង​ផ្សព្វផ្សាយ​អំពី​ចំណេះ​ដឹង​ហិរញ្ញវត្ថុ​ឲ្យ​កាន់​តែ​ទូលំ​ទូលាយ​ទៅ​ដល់​ប្រជាជន​ខ្មែរ​ តាមរយៈការប្រកួតប្រជែងគំនិតប្រកបដោយភាពច្នៃប្រឌិត ដែល​មាន​លក្ខណៈ​ជា​សិល្បៈ ​ដើម្បីឲ្យសារអប់រំងាយស្រួលយល់ និងអាចអនុវត្តបានសម្រាប់ប្រជាពលរដ្ឋគ្រប់កម្រិត។ លោក​ឲ្យ​ដឹងទៀតថា កម្មវិធីនេះ បានចូលរួមចំណែកទៅនឹងយុទ្ធសាស្រ្តជាតិ ស្តីពី​បរិយាបន្ន​ហិរញ្ញវត្ថុ​ឆ្នាំ២​០១៩-២០២៥ ក្នុងការលើកកម្ពស់ចំណេះដឹងផ្នែកហិរញ្ញវត្ថុ និង​បរិយាបន្ន​ហិរញ្ញវត្ថុ​ដល់​ប្រជាជនកម្ពុជា និងជាពិសេសយុវជន ដើម្បីជួយ​ឲ្យ​ពួក​គេ​យល់​ដឹង​ពី​សិទ្ធិ​ក្នុង​ការ​ប្រើប្រា​ស់ ជ្រើសរើស ចរចា លើសេវាហិរញ្ញវត្ថុរបស់គ្រឹះស្ថានធនាគារ និងហិរញ្ញវត្ថុ​ឲ្យបាន​កាន់​​តែ​ប្រសើរ​ឡើង​។

ក្នុងឱកាសនោះ លោក ទិត្យ កំរង បានរំលឹកឡើងវិញអំពីអ្វីដែលហៅថា ចំណេះដឹងហិរញ្ញវត្ថុ Financial Literacy? ចំណេះដឹងហិរញ្ញវត្ថុជាជំនាញជីវិត Life Skill មួយ​ដែល​ចាំ​បាច់​សម្រាប់​ជីវិត ជាជំនាញដែលទាក់ទងនឹងការរកចំណូល ការចំណាយ បំណុល និងការសន្សំ។ លោក​បន្ថែម​ថា ចំណេះដឹងហិរញ្ញវត្ថុបង្រៀនយើងពីការរៀបចំផែនការហិរញ្ញវត្ថុ គម្រោង​ថវិកា​ផ្ទាល់​ខ្លួន​ក៏​ដូច​ជា​ក្រុម​គ្រួសារ។ ស្របពេលដែលធនធានរបស់យើងមានកម្រិត ចំណេះ​ដឹង​ហិរញ្ញវត្ថុ​ជួយ​យើ​ង​ឱ្យចាត់ចែងធនធានទាំងនោះ ដើម្បីបម្រើឱ្យតម្រូវការចាំបាច់ប្រចាំថ្ងៃ អាច​ដោះ​ស្រាយ​បាន​នូវ​បញ្ហា ឬគ្រោះថ្នាក់នានាដែលមិនអាចស្មានទុកជាមុន និងធានា​បាន​នូវ​អនាគត​ដ៏​ល្អ​ប្រសើរ​មួយ​សម្រាប់​កូន​ចៅជំនាន់ក្រោយរបស់ខ្លួន។ លោកបន្តថា ជំនាញនេះកាន់តែសំខាន់សម្រាប់យុវជន ដើម្បី​ពួក​គេអាចត្រៀមខ្លួនជាមុនពេលប្រឡូកចូលក្នុងជីវិតការងារពួកគេផងដែរ។

សូម​បញ្ជាក់ថា កម្មវិធីប្រកួតប្រជែងស្តីពីការអប់រំចំណេះដឹងហិរញ្ញវត្ថុ (FECA) បានរៀបចំចំនួន ២លើក​រួច​មក​ហើយ​ក្នុងឆ្នាំ២០២១ ដោយក្រុមហ៊ុនឬទ្ធិពល។ ក្រុមហ៊ុននេះ បាន​ធ្វើ​ការ​បណ្តុះ​បណ្តាល​ចំណេះ​ដឹង​ហិរញ្ញវត្ថុ​តាំង​ពី​ឆ្នាំ២០១២ និង​មាន​បទ​ពិសោធន៍​រៀបចំ​កម្ម​វិធី​សិក្សា​ទាក់​ទង​នឹង​ការ​បណ្តុះបណ្តាលចំណេះដឹងហិរញ្ញវត្ថុនៅតាមសហគមន៍ និងយុវជន និងបានធ្វើ​ការងារ​ជាមួ​យ​បណ្តាអង្គការជាតិ និងអន្តរជាតិ ស្ថាប័នឯកជន ស្ថាប័នរដ្ឋាភិបាល និង​សាកលវិទ្យាល័យ​នានា​ជា​ច្រើន​ផ្សេង​ទៀត ដើម្បីឆ្លើយតបទៅនឹងការរីកចម្រើននៃប្រព័ន្ធបណ្តាញសង្គម និង​បច្ចេក​វិទ្យា​​នាពេលបច្ចុប្បន្ន៕