អ៊ីស្រាអែលកាលពីថ្ងៃចន្ទ បានចោទប្រកាន់អ៊ីរ៉ង់ថា បានសាង​សង់​ព្រលានយន្ត​ហោះ​នៅ​ប្រទេស​លី​បង់​ភាគ​ខាងត្បូង ក្បែរព្រំដែនអ៊ីស្រាអែល ដែលរដ្ឋមន្ត្រីការពារជាតិលោក Yoav Gallant ជឿ​ថា នឹងត្រូវបានប្រើជាមូលដ្ឋានសម្រាប់លទ្ធភាពវាយប្រហារភេរវកម្ម។

លោក Gallant បានបង្ហាញរូបភាពនៃអាកាសយានដ្ឋានក្នុងអំឡុងសន្និសីទនៅសាកលវិទ្យាល័យ Reichman ដោយនិយាយថា រូបភាពនោះ មានហត្ថលេខារបស់អ៊ីរ៉ង់ និងហេសបូឡា ដែល​ជា​ក្រុម​ភេរវករ​លីបង់គាំទ្រដោយទីក្រុងតេអេរ៉ង់។ អាកាសយានដ្ឋាននេះ មាន​ចម្ងាយ​ប្រហែល​១២​ម៉ាយ (១៩គីឡូម៉ែត្រ)ពីព្រំដែនអ៊ីស្រាអែល។

លោក Gallant បាននិយាយតាមសារព័ត៌មាន The Times of Israel ថា៖«នៅក្នុងរូបភាពនោះ អ្នក​អាចឃើញទង់ជាតិអ៊ីរ៉ង់បក់ពីខាងលើផ្លូវរត់យន្តហោះ ដែលរបបរបស់លោកអាយ៉ាតូឡាហ៍  (ayatollah) គ្រោងនឹងបើកប្រតិបត្តិការប្រឆាំងនឹងពលរដ្ឋអ៊ីស្រាអែល។ លោក​បានលើកឡើងមួយផ្សេងទៀតថាៈដីនេះគឺរបស់លីបង់ ការគ្រប់គ្រងគឺអ៊ីរ៉ង់ ហើយគោលដៅនេះ គឺ​អ៊ីស្រាអែល​។

លោក Gallant ពុំបានបញ្ជាក់លម្អិតពីគោលបំណងដែលអាចធ្វើទៅបានរបស់អ៊ីរ៉ង់ទេ ប៉ុន្តែ​បាន​និយាយ​ថា ​ទីតាំងនេះ អាចផ្ទុកយន្តហោះខ្នាតមធ្យមបាន៕