តៃវ៉ាន់ ៖ កោះតៃវ៉ាន់ «មិនមែនសម្រាប់ដាក់លក់នោះទេ»។ នេះគឺជាសម្ដីរបស់រដ្ឋមន្ត្រីការបរទេសរបស់កោះនេះ ដែលបាននិយាយនៅក្នុងការរិះគន់យ៉ាងធ្ងន់ៗដល់លោក Elon Musk ចំពោះការអះអាងថា កោះតៃវ៉ាន់ គឺជាចំណែកសំខាន់មួយរបស់ប្រទេសចិន ខណៈដែលមហាសេដ្ឋីរូបនេះបានដើរចូលទៅក្នុងបញ្ហាទំនាក់ទំនងដ៏ស្មុគស្មាញ រវាងទីក្រុងប៉េកាំង និងតៃប៉ិជាថ្មីម្ដងទៀត។

លោក Musk ដែលជាម្ចាស់កម្មវិធីបណ្ដាញសង្គម X (ពីមុនជា Twitter) ព្រមទាំងក្រុមហ៊ុនរថយន្តអគ្គិសនី Tesla (TSLA.O) និងបណ្តាញផ្កាយរណប Starlink បានធ្វើការអត្ថាធិប្បាយបែបនេះ ក្នុងកិច្ចប្រជុំ All-In Summit នៅទីក្រុង Los Angeles សហរដ្ឋអាមេរិក ដែលត្រូវបានបង្ហោះចូលទៅក្នុងឆាណែល YouTube នៅសប្តាហ៍នេះ។ .

លោក Musk បាននិយាយថា៖ «គោលនយោបាយរបស់ទីក្រុងប៉េកាំង គឺដើម្បីបង្រួបបង្រួមតៃវ៉ាន់ជាមួយប្រទេសចិន។ តាមគោលជំហររបស់ពួកគេ ករណីនេះប្រហែលជាស្រដៀងទៅនឹងកោះហាវ៉ៃ ឬអ្វីមួយដូចក្នុងទំនងបែបនោះ ពោលគឺកោះនេះដូចជាផ្នែកដ៏សំខាន់មួយរបស់ប្រទេសចិន ដែលមិនមែនជាផ្នែកមួយរបស់ប្រទេសចិនដោយមិនមានហេតុផលនោះទេ ព្រោះដោយភាគច្រើន កងនាវាចរប៉ាស៊ីហ្វិករបស់សហរដ្ឋអាមេរិក បានបញ្ឈប់រាល់កិច្ចប្រឹងប្រែងបង្រួបបង្រួមគ្រប់រូបភាព ដោយការប្រើប្រាស់កម្លាំង»។

រដ្ឋមន្ត្រីការបរទេសកោះតៃវ៉ាន់ លោក Joseph Wu តាមរយៈការបង្ហោះនៅលើបណ្ដាញសង្គម X កាលពីល្ងាចថ្ងៃពុធ (ទី១៣ ខែកញ្ញា) បានឆ្លើយតបថា លោកសង្ឃឹមថា លោក Musk អាចស្នើសុំឲ្យប្រទេសចិន «បើកបណ្ដាញសង្គម X ឲ្យប្រជាជនរបស់ខ្លួនប្រើប្រាស់ទៅចុះ»។ ការលើកឡើងបែបនេះ គឺដោយសារតែចិនហាមឃាត់មិនឲ្យប្រើប្រាស់បណ្ដាញសង្គម X រួមទាំងបណ្ដាញសង្គមលោកខាងលិចធំៗផ្សេងទៀតដូចជា Facebook ជាដើម។

ក្នុងន័យមិនចង់ឲ្យលោក Musk យកកោះតៃវ៉ាន់ទៅពាក់ព័ន្ធនោះ លោក Wu បាននិយាយបន្ថែមដោយប្រើអក្សរកាត់ PRC ដែលសំដៅដល់សាធារណរដ្ឋប្រជាមានិតចិនថា៖ «ស្តាប់ឲ្យបានជាក់ណា! កោះតៃវ៉ាន់មិនមែនជាផ្នែកនៃ PRC នោះទេ ហើយប្រាកដណាស់ មិនមានសម្រាប់លក់ដូរនោះដែរ»។

នេះមិនមែនជាលើកទី១ នោះទេ ដែលលោក Musk បានធ្វើឲ្យកោះតៃវ៉ាន់មានការខឹងសម្បា។ កាលពីខែតុលាឆ្នាំមុន លោកបានលើកឡើងថា ភាពតានតឹងរវាងចិន និងតៃវ៉ាន់ អាចត្រូវបានដោះស្រាយដោយការប្រគល់ការគ្រប់គ្រងមួយចំនួនរបស់កោះតៃវ៉ាន់ឲ្យទៅទីក្រុងប៉េកាំង ដោយពាក្យសម្ដីនេះ បាននាំឲ្យមានរិះគន់យ៉ាងខ្លាំងក្លាស្រដៀងគ្នានេះពីកោះតៃវ៉ាន់៕