ឧត្តមស្នងការសិទ្ធិមនុស្សអង្គការសហប្រជាជាតិ(UN)លោក Volker Türk បានបង្ហាញពីភាពក្រៀមក្រំយ៉ាងខ្លាំងចំពោះការបាត់បង់អាយុជីវិតមនុស្សនៅក្នុងប្រទេសលីប៊ី ។

លោក Volkerនិយាយថា លោកពិតជាសោកស្តាយខ្លាំងណាស់ចំពោះជីវិតមនុស្សរាប់ពាន់នាក់ដែលត្រូវបានទឹកហូរនាំយកទៅនៅតំបន់ភាគខាងកើតប្រទេសលីប៊ី ហើយមនុស្សជាច្រើននាក់ទៀត បានបាត់បត់មនុស្សជាទីស្រលាញ់របស់ពួកគេ ផ្ទះសម្បែងរបស់ពួកគេ សហគមន៍របស់ពួកគេ ហើយលោកសូមធ្វើការអំពាវនាវឲ្យក្រុមអ្នកនយោបាយលីប៊ីទាំងអស់ ត្រូវតែបញ្ជូនជំនួយដល់ជនរងគ្រោះ ។

លោកបន្តថា មនុស្សទាំងអស់ដែលរងផលប៉ះពាល់ដោយសារទឹកជំនន់ និងព្យុះ ត្រូវតែទទួលបានការគាំទ្រដោយគ្មានលក្ខខណ្ឌ ។ វាពិតជាសំខាន់ខ្លាំងដែលត្រូវធានាដល់មនុស្សនៅតាមតំបន់ងាយរងគ្រោះ ក្រោយលទ្ធផលនៃគ្រោះមហន្តរាយធម្មជាតិមួយនេះ ។

គួរឲ្យដឹងថា ប្រទេសលីប៊ី បានអំពាវនាវសុំជំនួយមនុស្សធម៌អន្តរជាតិ ក្រោយគោះទឹកជំនន់ដ៏អាក្រក់បំផុត បានសម្លាប់មនុស្សរាប់ពាន់នាក់ ខណៈដែលមនុស្សរាប់ពាន់នាក់ កំពុងបាត់ខ្លួន ហើយមនុស្សរាប់ម៉ឺននាក់ផ្សេងទៀត ត្រូវបានជម្លៀសខ្លួន។

ព្យុះ Daniel ដែលបង្កការបំផ្លិចបំផ្លាញនៅទូទាំងតំបន់សមុទ្រមេឌីទែរ៉ាណេកាលពីសប្តាហ៍កន្លងទៅ បានសម្លាប់មនុស្ស ១៥នាក់នៅតំបន់ភាគកណ្តាលប្រទេសក្រិកផងដែរ ជាកន្លែងដែលមានភ្លៀងធ្លាក់ខ្លាំង មុនពេលបោកបក់ឆ្លងកាត់ប្រទេសលីប៊ី។

ដោយឡែក ការឡើងកម្តៅផែនដី មានន័យថា តំបន់មួយនេះ នឹងប្រឈមព្យុះកំណាចដ៏អាក្រក់កើនឡើងនៅពេលអនាគត ៕