អគ្គលេខាធិការអង្គការសហប្រជាជាតិ(UN)លោក Antonio Guterres បានក្រើនរំឭកទីក្រុងម៉ូស្គូថាឲ្យប្រព្រឹត្តដោយប្រុងប្រយ័ត្ន។

លោក Guterres បាននិយាយប្រាប់ក្រុមអ្នកសារព័ត៌មានថា រាល់ទម្រង់នៃកិច្ចសហប្រតិបត្តិការរបស់ប្រទេសណាមួយជាមួយកូរ៉េខាងជើង ត្រូវតែគោរពវិធានទណ្ឌកម្ម ដែលបានដាក់ដោយក្រុមប្រឹក្សាសន្តិសុខ UN ដោយលោកបានធ្វើការសង្កត់ធ្ងន់ថា វាពិតជាមានការជាប់ពាក់ព័ន្ធគ្នាក្នុងករណីរបស់រុស្ស៊ី និងកូរ៉េខាងជើង ។

លោក Guterresបានបញ្ជាក់ថា លោកមានសារ ២។ សារទី ១ វាពិតជាចាំបាច់ខ្លាំងណាស់ត្រូវតែគោរពតាមសេចក្តីសម្រេចរបស់ក្រុមប្រឹក្សាសន្តិសុខ ។ កូរ៉េខាងជើង បានបំពានលើសេចក្តីសម្រេចរបស់ក្រុមប្រឹក្សាសន្តិសុខទំាងអស់នោះ ហើយលោកជឿថា កាលពីម្សិលមិញ ពួកយើងបានមើលឃើញមីស៊ីល ២គ្រាប់ ។ សារទី ២ រាល់ទម្រង់កិច្ចសហប្រតិបត្តិការរបស់ប្រទេសណាមួយជាមួយកូរ៉េខាងជើង ត្រូវតែគោរពវិធានទណ្ឌកម្មដែលបានដាក់ដោយក្រុមប្រឹក្សាសន្តិសុខ ។

គួរឲ្យដឹងថា មេដឹកនាំកូរ៉េខាងជើង លោក Kim Jong Un និងប្រធានាធិបតីរុស្ស៊ីលោក Vladimir Putin បានជួបគ្នានៅជំនួបកំពូលដ៏កម្រកាលពីថ្ងៃពុធ គឺជាជំនួបមួយដែលពួកគេបានពិភាក្សាលលើបញ្ហាយោធា សង្រ្គាមនៅអ៊ុយក្រែន ហើយនិងអាចជាជំនួយរបស់រុស្ស៊ីសម្រាប់កម្មវិធីផ្កាយរណបសម្ងាត់របស់រដ្ឋកុម្មុយនិស្តមួយនេះ ។

 លោក Putin បានបង្ហាញលោក Kimនូវទីតាំងបាញ់រ៉ុក្កែតអវកាសដ៏ទំនើបបំផុតរបស់រុស្ស៊ី ស្ថិតនៅតំបន់ជ្រោយភាគខាងកើតរុស្ស៊ី ហើយនិងបានពិភាក្សាលើលទ្ធភាពបញ្ជូនអវកាសយានិកកូរ៉េខាងជើងទៅកាន់ទីអវកាស ៕