ខ្សែការពារអង់គ្លេស Kyle Walker បានជម្រះ​មន្ទិល​ក្នុងការ​មិន​ប្រាកដ​ប្រជា​ជាមួយ​ក្រុម​មេឃ​ខៀវ ​Manchester City បន្ទាប់ពីសំរេចចុះហត្ថលេខារយៈពេល ២ ឆ្នាំបន្តនៅកីឡដ្ឋាន Etihad ដល់​ឆ្នាំ ២០២៦។

កិច្ចសន្យាចាស់របស់កីឡាករវ័យ ៣៣ ឆ្នាំរូបនេះនឹងអស់សុពលភាពនៅឆ្នាំ ២០២៤ ដំណាច់​រដូវកាល​នេះ ស្របពេលមានទំនាក់ទំនងផ្ទេរទៅកាន់ក្លិបអាល្លឺម៉ង់ Bayern Munich នៅ​ពេល​ទីផ្សារ​ទិញ​ដូរកីឡាករបើកចំហរកន្លងមក។

Kyle Walker បានឈ្នះពានសរុបជាមួយ Manchester City ១៣ ក្នុងរយៈពេល ៦ ឆ្នាំ​កន្លង​មក​។

ខ្សែការពារស្លាបស្តាំរូបនេះបានផ្លាស់មកាន់ City កាលពីខែសីហាឆ្នាំ ២០១៧ ផ្ទេរពី Tottenham Hotspur ក្នុងតម្លៃ ៤៥ លានផោន។

រដូវកាលមុន​ Kyle Walker បង្ហាញខ្លួនសរុប ៣៩ ប្រកួតគ្រប់ក្របខណ្ឌឱ្យ Manchester City ដែល​ឈ្នះពានបីក្នុងមួយរដូវកាល តែមិនបានចូលលេង ១១ នាក់ដំបូងឡើយពេល City ឈ្នះ Inter Milan នៅវគ្គផ្តាច់ព្រ័ត្រ។

រំលឹកថារដូវកាលមុន Walker ស្ទើរតែបាត់បង់តំណែងរបស់ខ្លួនទៅហើយ ដោយ​ធ្លាប់​ត្រូវ​បាន​គេ​ដឹង​ថា​មិនសប្បាយចិត្តនឹងពាក្យសំដីរបស់អ្នកចាត់ការ Pep Guardiola ដែលលើកឡើងថា Walker មិនអាចបត់បែនខ្លួនតាមយុទ្ធសាស្រ្តនៃប្រព័ន្ធការពារថ្មីដែលត្រូវលោក Pep យក​មក​ប្រើ​ប្រាស់​ចាប់​ពីពាក់កណ្តាលរដូវកាលមុន។

យ៉ាងណាក្តី អ្នកចាត់ការសញ្ជាតិអេស្ប៉ាញរូបនេះបានលើកឡើងកាលពីខែកក្កដាកន្លងមកថា នឹង​ធ្វើ​អ្វី​ៗ​គ្រប់យ៉ាងដើម្បីរក្សា Walker ឱ្យនៅបន្តជាមួយ Manchester City ស្របពេល Bayern Munich កាន់តែកៀកក្នុងការនាំយកខ្សែការពារវ័យ ៣៣ ឆ្នាំរូបនេះ។

រដូវកាលនេះ Kyle Walker បានចូលលេង ១១ នាក់ដំបូងទាំង ៤ ប្រកួតរបស់ City នៅ Premier League និង មួយប្រកួតទៀតនៅ UEFA Super Cup៕ អត្ថបទ៖នាង សុភាវុធ