ភ្នំពេញ ៖ ឧត្តមសេនីយ៍ឯក លន់ សុផាត អគ្គស្នងការរងនគរបាលជាតិ ក្រើនរំលឹកដល់នគរបាលនៅខេត្តរតនគិរីទាំង អស់គប្បីត្រូវត្រៀមលក្ខណៈជានិច្ច ដើម្បីរង់ចាំទទួលបទបញ្ជារបស់រាជរដ្ឋាភិបាល ក្នុងការជួយអន្តរាគមន៍ ជួយសង្គ្រោះបងប្អូនប្រជាពលរដ្ឋដែលជួបប្រទះគ្រោះមហន្តរាយគ្រប់បែបយ៉ាងជាយថាហេតុណាមួយនិង ត្រូវអនុវត្តឲ្យបានដាច់ខាតរាល់បទបញ្ជារបស់រាជរដ្ឋាភិបាល។

 ការលើកឡើងរបស់ឧត្តមសេនីយ៍អគ្គស្នងការរងនគរបាលរូបនេះ គឺបានធ្វើឡើងនៅក្នុងពិធីបិទវគ្គបំប៉នជំនាញការពារ ទប់ទល់សភាពការណ៍ ដល់មន្ត្រីនគរបាល កងអន្តរាគមន៏ពិសេស នៃស្នងការដ្ឋាននគរបាលខេត្តរតនគីរី នាព្រឹកថ្ងៃទី១៥ ខែកញ្ញា ឆ្នាំ២០២៣នេះ នៅស្នងការដ្ឋាននគរបាលខេត្តរតនគិរី។

 លោកឧត្តមសេនីយ៍ឯក បានលើកឡើងថា ក្នុងនាមកងកម្លាំងនគរបាលត្រូវត្រៀមខ្លួនគ្រប់ពេល វេលាទាំងអស់ស្តាប់រាល់បទបញ្ជារបស់រាជរដ្ឋាភិបាល ហើយយើងទាំងអស់គ្នាត្រូវការពារដាច់ខាត ជាតិ សាសនា ព្រះមហាក្សត្រ និងរាជរដ្ឋាភិបាលស្របច្បាប់ ដឹកនាំដោយ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដែលប្រសូត្រចេញពីការបោះឆ្នោត ផ្តល់សេចក្តីទុកចិត្តពីប្រជាពលរដ្ឋ។

 ទន្ទឹមនឹងការដែលត្រូវបង្កើនការយកចិត្តទុកដាក់ ប្រកាន់ឲ្យបានខ្ជាប់ខ្ជួននូវវិន័យ សេចក្តីថ្លៃថ្នូរ ជាមន្ត្រីនគរបាលជាតិ ក៏ត្រូវសហការឲ្យបានជិតស្និទ្ធ បំបាត់ឲ្យបាននូវភាពអសកម្មទាំងឡាយ ចៀសវាងនូវការប្រព្រឹត្តិបទល្មើសផ្សេងៗ ដូចជាសេពគ្រឿងញៀន ជួញដូរមនុស្ស លួច ឆក់ ប្លន់ ជាដើម ។ ល ។

 លោកឧត្តមសេនីយ៍ឯក ក៏បានអំពាវនាវដល់នគរបាលខេត្តរតនគិរីទាំងអស់ត្រូវបង្កើនវិធានការការគ្រប់គ្រង ថែរក្សាការពារសំភារៈ ឧបករណ៍ អាវុធជាតិផ្ទុះឲ្យបានគង់វង្ស និងពិសេសទៅទៀតនោះ គឺតៀមលក្ខណៈជានិច្ច រង់ចាំទទួលបទបញ្ជា ក្នុងការជួយអន្តរាគមន៍ ជួយសង្គ្រោះប្រជាពលរដ្ឋដែលជួបប្រទះគ្រោះមហន្តរាយគ្រប់បែបយ៉ាងជាយថាហេតុណាមួយ។ និងត្រូវយកចិត្តទុកដាក់លើការថែរក្សា សុខមាលភាព ធ្វើយ៉ាងណាឲ្យចៀសផុតពីជំងឺឆ្លងផ្សេងៗ។

 ជាមួយនេះ ឧត្តមសេនីយ៍ឯក លន់ សុផាត ក៏បានថ្លែងកោតសរសើរចំពោះកិច្ចខិតខំប្រឹងប្រែងបំពេញការងារ របស់ថ្នាក់ដឹកនាំនាយកដ្ឋាន - អង្គភាព ស្នងការដ្ឋាននគរបាលខេត្ត គណៈគ្រប់គ្រងវគ្គ គ្រូឧទេ្ទសនាម និងមន្ត្រីក្រោមឱវាទ ប្រកបដោយស្មារតីទទួលខុសត្រូវខ្ពស់ ក្នុងការរៀបចំ និងចាត់ចែងដំណើរការវគ្គនេះ ប្រព្រឹត្តទៅដោយរលូន និងតាមផែនការដែលបានកំណត់៕ អត្ថបទ ៖ បាន ចក់