ភ្នំពេញ ៖ តំណាងនិស្សិតកម្ពុជា ដែលកំពុងបន្តការសិក្សាថ្នាក់បរិញ្ញា និង ថ្នាក់អនុបណ្ឌិត នៅសាកលវិទ្យាល័យក្វាងស៉ី ប្រទេសចិនដែលស្ថិតនៅក្រុងណាននីង តំបន់ស្វយ័តជនជាតិក្វាងស៉ី ប្រទេសចិន បានបង្ហាញការសាទរ និង មោកភាពយ៉ាងក្រៃលែងចំពោះវត្តមានដ៏ខ្ពង់ខ្ពស់របស់សម្តេចធិបតី ហ៊ុន ម៉ាណែត មកកាន់ប្រទេសចិននៅពេលនេះ។ 

តំណាងនិស្សិតកម្ពុជាបានលើកឡើងថា ពួកគេពិតជាសប្បាយរីករាយ និង មានក្តីរំពឹងខ្ពស់ចំពោះដំណើរទស្សនកិច្ចជាផ្លូវរបស់សម្តេចមហាបវរធិបតី ហ៊ុនម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា មកកាន់ទឹកដីនៃសាធារណរដ្ឋប្រជាមានិតចិននៅពេលនេះ។ ពួកគេរំពឹងថា ទំនាក់ទំនងការទូតកម្ពុជា ចិន កាន់តែប្រសើរឡើងដែលនឹងផ្តល់ផ្លែផ្កាបន្ថែមទៀត ដល់ប្រជាជន និង ប្រទេសកម្ពុ ជា ។ ពួកគេបានបន្តថា ដំណើរទស្សនកិច្ចរបស់សម្តេចធិបតី ហ៊ុន ម៉ាណែត នៅពេលនេះ ធ្វើអោយពួកគេមានភាពកក់ក្តៅ និង ទំនុកចិត្តកាន់តែខ្លាំង ចំពោះការស្នាក់នៅ ការរៀនសូត្រ របស់ពួកគេនៅប្រទេសចិន។ 

បន្ថែមលើពីនេះ តំណាងនិស្សិតកម្ពុជា ក៏បានបង្ហាញពីការគាំទ្រយ៉ាងពេញទំហឹងចំពោះរាជរដ្ឋាភិបាលអាណត្តិទី៧ ក្រោមការដឹកនាំរបស់សម្តេចធិបតីហ៊ុនម៉ាណែត ដែលនឹងធ្វើអោយនាវាកម្ពុជាកាន់តែឆ្ពោះទៅមុខឥតឈប់ឈរតាមរយៈគោលនយោបាយដ៏ល្អ ផ្តោតលើការបណ្តុះបណ្តាលមូលធនមនុស្សជាចម្បង ដែលក្នុងនោះ ក្នុងនាមពួកយុវជនខ្មែរ ប្តេជ្ញាខិតខំរៀនសូត្រអោយខ្លាំង ដើម្បីចូលរួមជួយអភិវឌ្ឍន៍សង្គមជាតិ តាមគោលនយោបាយរបស់រាជរដ្ឋាភិបាលកម្ពុជានៅពេលនេះ។ 

សូមបញ្ជាក់ថា សម្តេចមហាបវរធិបតី ហ៊ុន ម៉ាណែត កំពុងស្ថិតនៅប្រទេសចិន ក្នុងដំណើរទស្សនកិច្ចផ្លូវការចាប់ពីថ្ងៃទី១៤ ដល់ទី ១៧ ខែកញ្ញា ឆ្នាំ២០២៣តបតាមការអញ្ចើញរបស់ ឯកឧត្តម លី ឈាង នាយករដ្ឋមន្ត្រីនៃសាធាររដ្ឋប្រជាមានិតចិន។ ចាប់តាំងពីថ្ងៃទី ១៤ រហូតមកដល់ពេលនេះ សម្តេចធិបតី បានទទួលជួបពិភាក្សាការងារជាមួយបណ្តាមេដឹកនាំធំៗជាច្រើនរូបដើម្បីផលប្រយោជន៍ជាតិ និង ប្រជាជនកម្ពុជា ។ នៅថ្ងៃទី១៦ស្អែកនេះ សម្តេចធិបតីហ៊ុន ម៉ាណែត នឹងមានវត្តមានក្នុងក្រុងណាននីង តំបន់ស្វយ័តជនជាតិក្វាងស៉ី ដើម្បីចូលរួមពិព័រណ៍អាស៊ាន-ចិន លើកទី២០ផងដែរ៕ អត្ថបទ ៖សូដាវណ្ណ