ប្រព័ន្ធផ្សព្វផ្សាយក្នុងស្រុក បានរាយការណ៍ថា កិច្ចព្រមព្រៀងបទឈប់បាញ់មួយ ត្រូវបានឈានដល់កាលពីថ្ងៃព្រហស្បតិ៍ នៅក្នុងជំរំ Ain Al-Helweh ប៉ាឡេស្ទីន ដែលមានទីតាំងនៅជិតទីក្រុងស៊ីដុន (Sidon) ប្រទេសលីបង់ភាគខាងត្បូង បន្ទាប់ពីការប៉ះទង្គិចគ្នា បានបណ្តាលឲ្យមនុស្សប្រហែល២០នាក់ស្លាប់ នៅទីនោះ ក្នុងសប្តាហ៍មុននេះ។

គេហទំព័រព័ត៌មានក្នុងស្រុក L'Orient Today បានរាយការណ៍ថា កិច្ចព្រមព្រៀងនេះ បានកើតឡើងបន្ទាប់ពីកិច្ចពិភាក្សារយៈពេលមួយថ្ងៃដែលផ្តួចផ្តើម ដោយប្រធានសភាលីបង់ លោក Nabih Berri។

ទីភ្នាក់ងារព័ត៌មានរដ្ឋ (NNA) បានរាយការណ៍កាលពីល្ងាចថ្ងៃព្រហស្បតិ៍ថា ដោយបានចូលជាធរមាន ចាប់ពីម៉ោង៦ល្ងាចតទៅ បទឈប់បាញ់នេះ បានធ្វើឲ្យលែងមានសំឡេងកាំភ្លើងផ្ទុះនៅក្នុងជំរុំAin Al-Helweh។

សារព័ត៌មាន NNA បាននិយាយថា ប៉ុន្តែភាពស្ងប់ស្ងាត់នេះ ត្រូវបានបំបែកដោយគ្រាប់ផ្លោងជាច្រើនគ្រាប់ ដែលបានបាញ់ នៅពេលខុសគ្នា នៅពេលយប់ ដោយបន្ថែមថា ការរំលោភលើកិច្ចព្រមព្រៀងឈប់បាញ់ នៅមានកម្រិត។