នគរបាលអង់គ្លេស បាននិយាយ នៅថ្ងៃសុក្រ(ទី១៥ ខែកញ្ញា)នេះ ថា ពួកគេបានចោទប្រកាន់មនុស្ស ៣នាក់ពីបទឃាតកម្មលើក្មេងស្រីអាយុ ១០ឆ្នាំ ឈ្មោះ Sara Sharif ដែលត្រូវបានគេរកឃើញថា ស្លាប់នៅក្នុងផ្ទះរបស់នាង កាលពីខែមុន ដោយក្នុងចំណោមជនជាប់ចោទទាំង ៣នាក់នោះ ក៏រួមមានទាំងឪពុករបស់ក្មេងស្រីផងដែរ។

ក្មេងស្រីរងគ្រោះ Sharif ត្រូវបានរកឃើញមានរបួសយ៉ាងធ្ងន់ធ្ងរនៅផ្ទះរបស់នាង ក្នុងទីក្រុង Woking ភាគនិរតីនៃទីក្រុងឡុងដ្រ៍ កាលពីថ្ងៃទី១០ ខែសីហា។ ឪពុករបស់ក្មេងស្រី លោក Urfan Sharif វ័យ ៤១ឆ្នាំ ប្រពន្ធរបស់លោក គឺលោកស្រី Beinash Batool វ័យ ២៩ឆ្នាំ និងពូរបស់ក្មេងស្រី លោក Faisal Malik វ័យ ២៨ឆ្នាំ បានធ្វើដំណើរទៅប្រទេសប៉ាគីស្ថាន នៅមុនថ្ងៃនោះ។

ពួកគេបានត្រឡប់ទៅប្រទេសអង់គ្លេសវិញ កាលពីថ្ងៃពុធ (ទី១៣ ខែសីហា) ជាថ្ងៃដែលពួកគេត្រូវបានចាប់ខ្លួន នៅឯអាកាសយានដ្ឋាន Gatwick នៃទីក្រុងឡុងដ្រ៍ បន្ទាប់ពីបានចុះពីជើងហោះហើរពីទីក្រុងឌូបៃ។

នគរបាលតំបន់ Surrey បាននិយាយថា ឥឡូវនេះអ្នកទាំង៣ ត្រូវបានចោទប្រកាន់ពីបទឃាតកម្ម និងបង្កឲ្យមាន ឬបណ្ដោយឲ្យមានការស្លាប់របស់កុមារ។ ជនទាំងនោះ នឹងត្រូវបង្ហាញខ្លួន នៅតុលាការ Guildford Magistrate នាល្ងាចថ្ងៃសុក្រនេះ៕