កណ្ដាល៖ នៅពេលបច្ចុប្បន្ននេះ នៅតាមមន្ទីរពេទ្យបង្អែកក្រុងស្រុកនានា របស់ខេត្តកណ្តាល មិនទាន់ប្រកាសបន្តបើកយុទ្ធនាការចាក់វ៉ាក់សាំងការពារកូវីដ១៩ដូសទី១ឡើងវិញនោះទេ ប៉ុន្តែទោះយ៉ាងណានៅក្នុងអំឡុងពេលនេះ រដ្ឋបាលខេត្តកណ្តាល បានបើកការផ្តល់អាទិភាពចាក់វ៉ាក់សាំងនេះ ជូនសម្រាប់តែពលរដ្ឋដែលរស់នៅក្នុងអតីតតំបន់ក្រហម និងតំបន់ប្រឈមនានាទៀតតែនៅក្នុងសង្កាត់តាខ្មៅ ក្រុងតាខ្មៅ ខេត្តកណ្តាលប៉ុណ្ណោះ។
បើតាមវេជ្ជបណ្ឌិត លី មករា ប្រធានមន្ទីរពេទ្យបង្អែកជ័យជំនះ ក្រុងតាខ្មៅបានថ្លែងប្រាប់BTV នៅថ្ងៃទី២៨ ខែឧសភានេះ ថា ជាក់ស្ដែងមកដល់ថ្ងៃនេះ មន្ទីរពេទ្យបន្តចាក់វ៉ាក់សាំងសម្រាប់តែពលរដ្ឋដែលត្រូវការចាក់ដូសទី២លើប្រភេទវ៉ាក់សាំងកូវីសែល និងស៊ីណូវ៉ាក់តែប៉ុណ្ណោះ ប៉ុន្តែដោយសាររដ្ឋបាលខេត្តមើលឃើញពីបញ្ហាប្រឈមខ្លាំង លើពលរដ្ឋរស់នៅក្នុងអតីតតំបន់ក្រហមនៅក្នុងសង្កាត់តាខ្មៅ ទើបមន្ទីរសុខាភិបាលសម្រេចរៀបចំវ៉ាក់សាំងចាក់ជូនពលរដ្ឋ ដែលរស់នៅក្នុងអតីតតំបន់ក្រហម និងមានការដឹកនាំអញ្ជើញមកចាក់ដោយផ្ទាល់ពីចៅសង្កាត់តាខ្មៅផងដែរ។
បើតាមលោក គិត សុផាន់ណារ៉ា សមាជិកក្រុមប្រឹក្សាសង្កាត់តាខ្មៅបានថ្លែងថា នៅក្នុងសង្កាត់តាខ្មៅ មានតំបន់ក្រហម តែមួយប៉ុណ្ណោះ គឺភូមិតាខ្មៅ២ឬហៅតំបន់អាគារវប្បធម៌ ដែលកន្លងមករងការបិទខ្ទប់ជិត៣សប្ដាហ៍ ហើយបន្ទាប់ពីបើកវិញជាង១០ថ្ងៃមកនេះ ទើបយើងអាចអញ្ជើញពួកគាត់អោយមកចាក់វ៉ាក់សាំងនេះបាន។
សម្រាប់ការចាក់វ៉ាក់សាំងនេះ បណ្តាពលរដ្ឋ បានថ្លែងអំណរគុណរាជរដ្ឋាភិបាល ដែលព្យាយាមខិតខំស្វែងរកវ៉ាក់សាំងចាក់ជូនបណ្តាពលរដ្ឋ តាមរយៈការចាក់វ៉ាក់សាំងនេះ គេក៏ត្រូវបានបន្តខិតខំប្រឹងប្រែងអនុវត្តវិធាន៣កុំ ៣ការពារ ឱ្យបានល្អ ដើម្បីទប់ស្កាត់ការរាតត្បាតចំលងមេរោគកូវីដ១៩នៅក្នុងសង្គមជាតិយើង។
បើតាមការបញ្ជាក់ថា ឯកឧត្តម គង់ សោភ័ណ្ឌ អភិបាលខេត្តកណ្តាល មកដល់ពេលនេះ ខេត្តកណ្តាល បានសម្រេចចាក់វ៉ាក់សាំងការពារជូនពលរដ្ឋជួរមុខ និងពលរដ្ឋអាទិភាពនៅក្នុងខេត្តបានចំនួនជាង ១០ម៉ឺននាក់ ហើយនៅពេលនេះ ខេត្តបានរៀបចំផែនការចាក់វ៉ាក់សាំងនេះរួចហើយ ដើម្បីត្រៀមបន្តចាក់ជូនបណ្តាពលរដ្ឋចាប់ពីអាយុ១៨ឆ្នាំឡើងទៅអោយបានគ្រប់ៗគ្នា៕ អត្ថបទ៖ ស៊ុម សុខជា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
