ការបាត់មុខរបស់រដ្ឋមន្ត្រីការពារជាតិប្រទេសចិន ដែលជាការចលាចលចុងក្រោយបង្អស់នៅក្នុងជួរមន្ត្រីជាន់ខ្ពស់របស់ប្រទេសនេះ កំពុងបង្កឱ្យមានភាពមិនច្បាស់លាស់អំពីរបបគ្រប់គ្រងរបស់លោកប្រធានាធិបតី Xi Jinping ខណៈសម្ពាធសន្តិសុខផ្ទៃក្នុង ធ្វើឱ្យមានការតាមដានពីអន្តរជាតិ។

ក្រុមអ្នកការទូត និងអ្នកវិភាគបាននិយាយថា ភាពមិនអាចទាយទុកជាមុនបាន កាន់តែកើនឡើង អាចប៉ះពាល់ដល់ទំនុកចិត្តដែលប្រទេសផ្សេងទៀតមានចំពោះការដឹកនាំនៃប្រទេសមានសេដ្ឋកិច្ចធំបំផុតទីពីររបស់ពិភពលោកមួយនេះ។

ទីភ្នាក់ងារព័ត៌មាន Reuters បានរាយការណ៍កាលពីថ្ងៃសុក្រថា រដ្ឋមន្ត្រីការពារជាតិលោក លី សាងហ្វូ(Li Shangfu) ដែលបានខកខានកិច្ចប្រជុំរួមទាំងជាមួយសមភាគីបរទេសយ៉ាងហោចណាស់មួយរូប ចាប់តាំងពីលោកត្រូវបានគេឃើញចុងក្រោយកាលពីចុងខែសីហានោះ កំពុងដាក់ឲ្យស្ថិតក្រោមការស៊ើបអង្កេតពាក់ព័ន្ធអំពើពុករលួយលើលទ្ធកម្មយោធា។

រដ្ឋមន្ត្រីការបរទេសដែលទើបដំឡើងតំណែងថ្មីលោកឈីន កាង (Qin Gang) បានបាត់ខ្លួនដោយមានការពន្យល់តិចតួចកាលពីខែកក្កដា ជាខែដូចគ្នាជាមួយនឹងការរុះរើរភ្លាមៗនៃកងកម្លាំងរ៉ូកែតសម្រាំងរបស់យោធា ដែលគ្រប់គ្រងឃ្លាំងអាវុធនុយក្លេអ៊ែររបស់ប្រទេសចិន។ 

ខណៈលោក Xi ជាអគ្គមេបញ្ជាការយោធារបស់ប្រទេសចិន បានផ្តោតការយកចិត្តទុកដាក់កផ្នែកខាងក្នុង លោកបានបង្កឱ្យមានការព្រួយបារម្ភក្នុងចំណោមក្រុមអ្នកការទូតបរទេសក្នុងខែនេះ ដោយបានខកខានកិច្ចប្រជុំកំពូលក្រុម G20 នៅក្នុងប្រទេសឥណ្ឌា ជាលើកទីមួយដែលលោកបានរំលងការជួបជុំមេដឹកនាំពិភពលោកក្នុងទសវត្សរ៍កាន់អំណាចរបស់លោក។ 

ដោយបានប្រឈមនឹងភាពមិនច្បាស់លាស់ដែលកំពុងកើនឡើង ក្រុមអ្នកការទូត និងអ្នកវិភាគមួយចំនួនកំពុងអំពាវនាវឱ្យមានការសំឡឹងមើលយ៉ាងយកចិត្តទុកដាក់ចំពោះស្ថានភាពពិតនៃរបបរបស់លោក Xi ៕