ក្រុមអាជ្ញាធរលីប៊ីបានបើកការស៊ើបអង្កេតលើការបាក់ទំនប់វារីអគ្គិសនីចំនួនពីរ ដែលបណ្តាលឱ្យមានទឹកជំនន់ដ៏បំផ្លិចបំផ្លាញនៅក្នុងទីក្រុងឆ្នេរសមុទ្រមួយ ខណៈក្រុមជួយសង្គ្រោះបានស្វែងរកសាកសពកាលពីថ្ងៃសៅរ៍  ជិតមួយសប្តាហ៍បន្ទាប់ពីទឹកជំនន់បានសម្លាប់មនុស្សជាង ១១.០០០នាក់។

ភ្លៀងធ្លាក់ខ្លាំងដែលបង្កឡើងដោយព្យុះសមុទ្រមេឌីទែរ៉ាណេ ដានីយ៉ែល (Daniel) បណ្តាលឱ្យមានទឹកជំនន់ដ៏ ធ្ងន់ធ្ងរបំផុតនៅទូទាំងភាគខាងកើតប្រទេសលីប៊ីកាលពីចុងសប្តាហ៍មុន។ ទឹកជំនន់បានគ្របដណ្ដប់លើទំនប់ចំនួនពីរ ដោយបានហូរគួចនាំយកជញ្ជាំងទឹកដែលមានកម្ពស់ជាច្រើនម៉ែត្រ កាត់កណ្តាលទីក្រុង ឌើណា (Derna) បំផ្លាញតំបន់នេះទាំងមូល និងបានហូរកួចមនុស្សចូលទៅក្នុងសមុទ្រ។

យោងតាមអឌ្ឍចន្ទក្រហមលីប៊ី មនុស្សជាង ១០.០០០ នាក់កំពុងបាត់ខ្លួន។ រយៈពេល៦ថ្ងៃ ក្រោយមក ក្រុមអ្នកស្វែងរកនៅតែកំពុងជីកកកាយដីល្បប់ និងតាមចន្លោះអគារនានា ដើម្បីស្វែងរកសាកសព និងអ្នកអាចនៅរស់រានមានជីវិត។ អឌ្ឍចន្ទក្រហម បានបញ្ជាក់ពីការស្លាប់ចំនួន ១១.៣០០នាក់ រហូតមកដល់ពេលនេះ។

លោកស្រី ឃ្លែ នីកូឡេត (Claire Nicolet) ប្រធានផ្នែកសង្គ្រោះបន្ទាន់នៃក្រុមជំនួយគ្រូពេទ្យ គ្មានព្រំដែន បាននិយាយថា ក្រុមអ្នកជួយសង្គ្រោះបានរកឃើញ សាកសពជាច្រើន កាលពីថ្ងៃសុក្រ ហើយកំពុងបន្តស្វែងរក។ លោកស្រី បានប្រាប់សារព័ត៌មាន AP ថា នេះ គឺជាចំនួនដ៏ច្រើន  សាកសពជាច្រើននៅតែត្រូវបានទឹករលករុញច្រានមកកាន់ច្រាំងសមុទ្រ ៕