មេដឹកនាំកូរ៉េខាងជើងលោក Kim Jong-un បានធ្វើដំណើរ​វិលទៅ​ប្រទេស​របស់​លោក​វិ​ញ​កាល​ពី​ថ្ងៃ​អាទិត្យ បន្ទាប់​ពី​បញ្ចប់​ដំណើរ​ទស្សន​កិច្ច​ទៅ​កាន់​ប្រទេស​រុស្ស៊ីជា​ច្រើន​ថ្ងៃ​ជិត​១​សប្ដាហ៍​របស់​លោក​ ដែល​បាន​ធ្វើ​ឲ្យ​ពិភពលោក​ព្រួយ​បារម្ភ​ខ្លាំង​អំពី​លទ្ធភាព​នៃ​កិច្ច​ព្រម​ព្រៀង​អាវុធ​រវាង​ប្រទេស​ទាំង​២​។

ទីភ្នាក់ងារសារព័ត៌មានរដ្ឋ Tass របស់រុស្ស៊ី បានរាយការណ៍ថា លោក Kim បានចាកចេញ​ពី​ប្រទេស​រុស្ស៊ី ​តាមរថភ្លើងពាសដែកពីតំបន់ព្រីម៉ូយ៉េ (Primorye)នៅក្នុ​ង​តំបន់​ចុង​បូព៌ា​របស់​រុស្ស៊ីក្រោយ​ពិធីលាដែលបានធ្វើឡើងនៅស្ថានីយ៍រថភ្លើងអាទីយ៉ូមព្រីម៉ូស្គី១ (Artyom-Primorsky-1)​ ។

ចម្ងាយពីទីក្រុង អាទីយ៉ូម ទៅកាន់ស្ថានីយ៍រថភ្លើងខាសាន (Khasan) នៅតាមព្រំដែនរបស់រុស្ស៊ី ជាមួយកូរ៉េខាងជើងជាង២០០គីឡូម៉ែត្រ។  

សហរដ្ឋអាមេរិក និងសម្ព័ន្ធមិត្តរបស់ខ្លួន រួមទាំងកូរ៉េខាងត្បូង បាននិយាយថា កូរ៉េខាង​ជើង​អាច​ផ្ដល់​គ្រាប់​រំសេវសម្រាប់សង្រ្គាមរបស់រុស្ស៊ីនៅអ៊ុយក្រែន ជាថ្នូរ​នឹង​បច្ចេក​វិទ្យា​ផលិត​អាវុធ​ទំនើប​របស់​រុស្ស៊ី ​ដែលនឹងបង្កើនមហច្ឆិតានុយក្លេអ៊ែររបស់លោក Kim។

ដំណើរទៅ​កាន់បរទេសលើកដំបូងក្នុងរយៈពេលជាង៤ឆ្នាំរបស់មេដឹកនាំកូរ៉េខាងជើងរូបនេះ បានរួម​បញ្ចូលទាំងជំនួបមួយជាមួយលោកប្រធានាធិបតីរុស្ស៊ី Vladimir Putin និងការពិនិត្យ​មើល​យន្ត​ហោះជម្លាក់គ្រាប់បែកយុទ្ធសាស្ត្របំពាក់នុយក្លេអ៊ែរ មីស៊ីលល្បឿនលឿនជាងសំឡេង និង​នាវាចម្បាំងជាដើម៕