ប្រជាជននៅក្នុងជំរំប្រទេសម៉ារ៉ុក សម្រាប់អ្នកទាំងឡាយណាដែលបានរងផលប៉ះពាល់ដោយរញ្ជួយដីដ៏មហន្តរាយបានតម្រង់ជួរយកអាហារពីផ្ទះបាយយោធា។ ទាហាននិយាយថា ក្រុមទាហាន បានចម្អិនអាហារ ១៨.០០០កញ្ចប់ រៀងរាល់ថ្ងៃ គ្រប់ពេលទទួលទានអាហារ សម្រាប់អ្នកជម្លៀសខ្លួន ដែលកំពុងរស់នៅក្នុងជំរំផ្តល់ជំនួយដោយយោធា ក្នុងទីក្រុង Amizmiz។

យោងតាមយោធាបានឲ្យដឹងថាមនុស្សជាង១.៥០០នាក់ បានទទួលអាហារ ដោយស្ត្រីនឹងកុមារ ត្រូវបានផ្តល់ឲ្យមុន បន្ទាប់មកផ្តល់ឲ្យបុរស។ យោធានិយាយថា ពលរដ្ឋនៅក្នុងជំរំនេះ ទទួលបានការព្យាបាលវេជ្ជសាស្ត្រប្រចាំថ្ងៃ។

ស្ត្រីម្នាក់នៅជំរំ នាង Jammo Ajamil បាននិយាយថាពួកគេបានផ្តល់ឲ្យយើងនូវឱសថ ដែលពួកគេបានសួរយើងថាតើមាននណាម្នាក់ឈឺទេ ហើយបានព្យាបាលឲ្យយើងប្រសិនបើត្រូវការ។ ពួកគេបានមកពិនិត្យយើងនៅពេលយប់ដើម្បីមើលថាតើអ្វីៗល្អប្រសើរឬទេ និងមើលថាតើយើងត្រូវការអ្វី។

យោងតាមតួលេខផ្លូវការចុងក្រោយ បានឲ្យដឹងថា រញ្ជួយដីកម្រិត៦,៨ រិចទ័រ ដែលបានវាយប្រហារកាលពីថ្ងៃទី៨ ខែកញ្ញា បណ្តាលឲ្យមនុស្ស ២.៩៤៦នាក់ស្លាប់ និងរងរបួស ៥.៦៧៤នាក់ ដែលបានធ្វើឲ្យប្រទេសម៉ារ៉ុក មានអ្នកស្លាប់ច្រើនបំផុត ចាប់តាំងពីឆ្នាំ១៩៦០ និងជារញ្ជួយដីមានឥទ្ធិពលបំផុតចាប់តំាងពីឆ្នាំ ១៩០០។