ប្រទេសកូរ៉េខាងត្បូង បាននិយាយកាលពីថ្ងៃចន្ទនេះថា ខ្លួនកំពុងធ្វើការជាមួយគ្រប់ភាគីដែលពាក់ព័ន្ធ ដើម្បីដកការបង្កកមូលនិធិរបស់អ៊ីរ៉ង់ដែលមានតម្លៃ៦ពាន់លានដុល្លារ ដែលនៅពេលដែលមូលនិធិ ត្រូវបានដកការបង្កនោះ នឹងបង្កឲ្យមានកិច្ចព្រមព្រៀងដ៏ប្រុងប្រយ័ត្នរវាងគូសត្រូវដ៏ធំរបស់សហរដ្ឋអាមេរិក និងអ៊ីរ៉ង់ ដើម្បីដោះដូរអ្នកជាប់ឃុំទាំងនោះ។

នៅពេលដែលមូលនិធិ ត្រូវបានផ្ទេរទៅប្រទេសកាតា ដែលបានសម្រុះសម្រួលកិច្ចព្រមព្រៀងនេះ ក្នុងអំឡុងពេលកិច្ចចរចាជាច្រើនខែ ជនជាតិអាមេរិកចំនួន៥នាក់ ដែលត្រូវបានជាប់ពន្ធនាគារ នៅក្នុងប្រទេសអ៊ីរ៉ង់ ត្រូវបានគេរំពឹងថា នឹងចាកចេញពីទីក្រុងតេអេរ៉ង់ទៅកាន់ទីក្រុងដូហាពីកន្លែងដែលពួកគេនឹងធ្វើដំណើរទៅកាន់សហរដ្ឋអាមេរិក។

ជាថ្នូរនោះ ជនជាតិអ៊ីរ៉ង់៥នាក់ដែលត្រូវបានឃុំខ្លួននៅអាមេរិក នឹងត្រូវបានដោះលែងឲ្យពួកគេអាចធ្វើដំណើរទៅអ៊ីរ៉ង់។ ក្រុមមន្ត្រីអ៊ីរ៉ង់ និងទីភ្នាក់ងារសារព័ត៌មានរដ្ឋរបស់អ៊ីរ៉ង់ បាននិយាយថា ម្នាក់ក្នុងចំណោមអ្នកជាប់ឃុំទាំងនោះ ត្រូវបានគេរំពឹងថា នឹងបន្តនៅក្នុងសហរដ្ឋអាមេរិក។

ពេលវេលាច្បាស់លាស់នៃការផ្ទេរមូលនិធិ ពុំទាន់ត្រូវបានប្រកាសជាសាធារណៈនៅឡើយទេ។

កិច្ចព្រមព្រៀងដែលបានប្រកាសជាសាធារណៈលើកដំបូងនៅថ្ងៃទី១០ ខែសីហា នឹងជម្រះនូវភាពខឹងសម្បាគ្នាដ៏ខ្លាំងក្លា រវាងទីក្រុងវ៉ាស៊ីនតោន និងទីក្រុងតេអេរ៉ង់ បើទោះបីជាភាគីទាំងពីរ នៅតែមានការខ្វែងគំនិតគ្នាទៅលើបញ្ហាជាច្រើន ចាប់ពីមហិច្ឆតានុយក្លេអ៊ែររបស់អ៊ីរ៉ង់ និងឥទ្ធិពលរបស់ខ្លួននៅជុំវិញតំបន់ រហូតដល់ការដាក់ទណ្ឌកម្មរបស់សហរដ្ឋអាមេរិកនិងវត្តមានយោធារបស់អាមេរិកនៅក្នុងឈូងសមុទ្រនេះ។