​អឺរ៉ុប៖ បណ្ដា​ប្រទេស​សហភាព​អឺរ៉ុប​ បាន​ពង្រាង​ផែនការសំរាប់​ការ​ដាក់​ទណ្ឌកម្ម​ថ្មី​លើ​ប្រទេ​ស​​បេឡា​រូស ដែល​ដាក់​គោលដៅ​លើ​វិស័យ​សេដ្ឋកិច្ច ខណៈ​ប្រទេស​នេះ​បាន​បង្ខំ​ឲ្យ​យន្តហោះ​ដឹក​អ្នកដំណើរ​មួយ​គ្រឿង បង្វែរ​ទិសដៅ​ចុះចត​នៅ​ក្នុង​ប្រទេស​នេះ​ដើម្បី​ចាប់ខ្លួន​អ្នកសារព័ត៌មាន​ប្រឆាំង​ម្នាក់​។

កិច្ចប្រជុំ​របស់​រដ្ឋមន្ត្រី​ការបរទេស​សហភាព​អឺរ៉ុប​ក្នុង​ទីក្រុង Lisbon ប្រទេស​ព័រទុយហ្គាល​បាន​សន្យា​បន្ត​ដាក់​សម្ពាធ​លើ​ប្រធានាធិបតី​ប្រទេស​បេឡា​រុស លោក Alexander Lukashenko​។ បញ្ជី​នៃ​ការ​ដាក់​ទណ្ឌកម្ម​របស់​សហភាព​អឺរ៉ុប ដាក់​ទៅលើ​សមាជិក​ជាន់​ខ្ពស់​របស់​រដ្ឋាភិ​បា​ល​បេឡា​រុស រួម​ទាំងលោក​ប្រធានាធិបតី Lukashenko។ ប្រធាន​គោលនយោបាយ​ការបរទេស លោក Josep Borrell និយាយ​ថា ប្លុក​អឺរ៉ុប​នឹង​មិន​បន្ធូរបន្ថយ​សម្ពាធ​លើ​ប្រទេស​បេឡា​រុស​ឡើយ​។ យើង​ត្រូវ​ធ្វើ​សកម្មភាព​បន្ថែ​មឲ្យ​បាន​លឿន​ ចំពោះ​ការ​ដាក់​ទណ្ឌកម្ម​។ ទន្ទឹម​នឹង​នេះ​ដែរ រដ្ឋមន្ត្រី​ព័ត៌មាន​សេត​វិមាន លោកស្រី Jen Psaki និយាយ​ថា​ សេត​វិមាន​បាន​ប្រកាស​ថា នឹង​ដាក់​ទណ្ឌកម្ម​លើ​ប្រទេស​បេឡា​រុស​ដូច​គ្នា​នេះ​។ បន្ថែម​លើ​វិធានការ​ជាច្រើន​ដែល​បាន​ប្រកាស​រួច​កាល​ពី​សប្ដាហ៍​ថ្មីៗ​នេះ ទីក្រុង​វ៉ាស៊ីនតោន​និយាយ​ថា​ នឹង​ធ្វើ​ការ​ជាមួយ​សហភាព​អឺរ៉ុប​លើ​បញ្ជី​ដាក់ទណ្ឌកម្ម ​លើ​សមាជិក​សំខាន់ៗ​នៃ​របប​​លោកប្រធានាធិបតី​ Alexander Lukashenko។

ការ​ដាក់​ទណ្ឌកម្ម​សេដ្ឋកិច្ច​លើ​សហគ្រាស​រដ្ឋ​ប្រទេស​បេឡា​រុស​ចំនួន ​៩ ត្រូវ​បាន​ដាក់​សាជាថ្មី​កាលពី​ខែ​មេសា បន្ទាប់​ពី​ការ​បង្ក្រាប​ទៅលើ​ការ​តវ៉ា​គាំទ្រ​លទ្ធិប្រជាធិបតេយ្យ ដែល​នឹង​ចូល​ជា​ធរមាន​នៅ​ថ្ងៃ​ទី​០៣ ខែ​មិថុនា​។ បន្ថែម​លើ​ការ​ដាក់​ទណ្ឌកម្ម សេត​វិមាន​បាន​ចេញ​ការព្រមាន ‘Do not Travel’ សំរាប់​ប្រទេស​បេឡា​រូសចំពោះ​ប្រជាជន​អាមេរិក និង​បាន​ព្រមាន​ដល់​យន្តហោះ​ដឹក​អ្នកដំណើរ​អាមេរិក​អនុវត្ត​ការ​ប្រុង​ប្រយ័ត្ន​តឹងរ៉ឹង ប្រសិនបើ​ហោះ​ហើរ​លើ​ដែន​អាកាស​ប្រទេស​បេឡា​រុស​៕

អត្ថបទ៖ ប៊ុនថន