ក្រុមអ្នកបើកបរនៅក្នុងទីក្រុង Sevastopol ឧបទ្វីបគ្រីមៀ បាននិយាយថា ការហក់ឡើងខ្ពស់តម្លៃហ្គាស និងកង្វះខាតការផ្គត់ផ្គង់ប្រេងឥន្ធនៈ បានធ្វើឲ្យប៉ះពាល់ដល់ពួកគេយ៉ាងខ្លាំង ប៉ុន្តែពួកគេគ្មានជម្រើសផ្សេងក្រៅពីបង់ថ្លៃនោះទេ ពីព្រោះថាពួកគេត្រូវការបើកបរ។

 ប្រភពទីផ្សារ បាននិយាយប្រាប់ទីភ្នាក់ងារព័ត៌មានរ៉យទ័រថា រុស្ស៊ីដែលស្ថិតនៅក្នុងចំណោមប្រទេសផលិតប្រេងធំបំផុតរបស់ពិភពលោក បានប្រឈមនឹងកង្វះខាតប្រេងដ៏សំខាន់សម្រាប់ការប្រមូលផលនៅតំបន់ភាគខាងត្បូងដែលជាមជ្ឈមណ្ឌលកសិកម្ម ហើយស្ថានភាព អាចនឹងធ្ងន់ធ្ងរជាងនេះ នៅក្នុងរយៈពេលប៉ុន្មានខែទៀត ។

 ក្រុមពាណិជ្ជករ និយាយថា ទីផ្សារប្រេងឥន្ធនៈ បានរងផលប៉ះពាល់ដោយសារកត្តាជាច្រើនផ្សេងៗគ្នា ដែលរួមទាំងការថែទាំរោងចក្រចម្រាញ់ប្រេងកាត ការស្ទះហេដ្ឋារចនាសម្ព័ន្ធលើផ្លូវរថភ្លើង ហើយនិងការធ្លាក់ថ្លៃប្រាក់រូប្លិ៍។

 រុស្ស៊ីបានព្យាយាមដោះស្រាយបញ្ហាកង្វះខាតប្រេងម៉ាស៊ូត និងប្រេងសាំង ក្នុងរយៈពេលជាច្រើនខែកន្លងមកនេះ ដោយពួកគេព្យាយាមទប់ស្កាត់ការនាំចេញ ដើម្បីការពារកុំឲ្យមានវិបត្តិប្រេងឥន្ធនៈធ្ងន់ធ្ងរ ។

 ដោយឡែក ការសម្រេចរបស់រដ្ឋាភិបាលក្នុងការកាត់បន្ថយឧបត្ថម្ភធន សម្រាប់រោងចក្រចម្រាញ់ប្រេងកាតទំនងជាធ្វើឲ្យលទ្ធភាពរបស់ប្រេងកាន់តែអាក្រក់ទៅនៅក្នុងប្រទេសនាំចេញគ្រាប់ធុញ្ញជាតិធំបំផុតរបស់ពិភពលោកមួយនេះ ៕