រដ្ឋាភិបាលរបស់នាយករដ្ឋមន្រ្តីឥណ្ឌា លោក Narendra Modi នៅថ្ងៃអង្គារ (ទី១៩ ខែកញ្ញា) នេះ បានជំរុញដល់សេចក្ដីស្នើច្បាប់ ដើម្បីបម្រុងទុកមួយភាគបីនៃអាសនៈ នៅក្នុងសភាជាន់ទាប និងសភាប្រចាំរដ្ឋ សម្រាប់ស្ត្រី ដោយកែប្រែឡើងវិញនូវការស្នើចាស់ ដែលរំពឹងថា នឹងជំរុញគោលជំហរគណបក្សរបស់លោក ក្នុងចំណោមស្ត្រី។

សំណើច្បាប់ដ៏ចម្រូងចម្រាសនេះ ត្រូវបានព្យួរអស់រយៈពេលជាច្រើនទសវត្សរ៍មកហើយ ដោយសារមានការជំទាស់ពីគណបក្សនយោបាយមួយចំនួន ហើយត្រូវការការយល់ព្រមពីសភាទាំងពីរ និងសភាប្រចាំរដ្ឋភាគច្រើន ដើម្បីឲ្យក្លាយជាច្បាប់ជាធរមាន។

ការសើរើឡើងវិញរបស់ច្បាប់នេះកើតមានឡើងប៉ុន្មានខែនៅមុនពេលការបោះឆ្នោតសកល ដែលគ្រោងនឹងកើតមានត្រឹមខែឧសភា ឆ្នាំ២០២៤ ខណៈដែលលោក Modi ស្វែងរកការកាន់អំណាចអាណត្តិទី៣។ អ្នកវិភាគនានា និយាយថា ឱកាស ក្នុងការទទួលបានការអនុម័តសម្រាប់សេចក្តីព្រាងច្បាប់នេះ នៅក្នុងសភា មានច្រើនណាស់ ដោយសារការប្រឆាំងនឹងច្បាប់នេះ បានធ្លាក់ចុះ ក្នុងរយៈពេលជាច្រើនឆ្នាំមកនេះ៕