ក្រសួងពាណិជ្ជកម្មចិន កាលពីថ្ងៃអង្គារ (ទី១៩ ខែកញ្ញា) បានឲ្យដឹងថា ប្រទេសចិនបានប្តឹងតវ៉ាជំទាស់នឹងរបាយការណ៍របស់អង្គការពាណិជ្ជកម្មពិភពលោក (WTO) ដែលបានទទួលស្គាល់ថា ការអនុវត្តរបស់សហរដ្ឋអាមេរិក ពាក់ព័ន្ធនឹងដែកថែប និងអាលុយមីញ៉ូម គឺជាវិធានការសន្តិសុខ។

ក្រុមប្រឹក្សាដោះស្រាយវិវាទរបស់ WTO កាលពីខែមុន បានសម្រេចគាំទ្រទីក្រុងវ៉ាស៊ីនតោន ជុំវិញជម្លោះពន្ធជាមួយទីក្រុងប៉េកាំង ដោយបញ្ជាក់ថា ខ្លួនបានរកឃើញថា ប្រទេសចិនបានធ្វើសកម្មភាពផ្ទុយនឹងកាតព្វកិច្ចនៅ WTO របស់ខ្លួន ដោយការបន្ថែមពន្ធលើទំនិញរបស់សហរដ្ឋអាមេរិក ដែលជាការឆ្លើយតបទៅនឹងការដាក់ពន្ធនាំចូលរបស់សហរដ្ឋអាមេរិកលើទំនិញដែកថែប និងអាលុយមីញ៉ូម។

សូមរំលឹកថា សហរដ្ឋអាមេរិកបានដាក់ពន្ធ ២៥ភាគរយលើការនាំចូលដែកថែប និង ១០ភាគរយលើការនាំចូលអាលុយមីញ៉ូមពីបណ្តាប្រទេសនានា ក្នុងនោះរួមទាំងប្រទេសចិនផងដែរ ក្នុងឆ្នាំ២០១៨ ក្រោមការដឹកនាំរបស់លោក Donald Trump។ ជាការឆ្លើយតប ទីក្រុងប៉េកាំងបានប្រកាសពីការបន្ថែមពន្ធ ដែលត្រូវអនុវត្តចំពោះការនាំចូលមួយចំនួន ដែលមានប្រភពមកពីសហរដ្ឋអាមេរិក។

ក្រសួងពាណិជ្ជកម្មចិនបានលើកឡើងនៅក្នុងសេចក្តីថ្លែងការណ៍ថា សេចក្តីសម្រេចរបស់ក្រុមប្រឹក្សា WTO មាន «កំហុសឆ្គងផ្នែកផ្លូវច្បាប់» ហើយបានបន្ថែមថា ការកម្រិតពន្ធរបស់សហរដ្ឋអាមេរិកលើការនាំចូលដែកថែប និងអាលុយមីញ៉ូម គឺជា«វិធានការឯកតោភាគី និងជាតិនិយម ដែលត្រូវបានគេរកឃើញថា បំពានលើច្បាប់របស់ WTO»៕