អង្គការឃ្លាំមើល កាលពីថ្ងៃអង្គារ (ទី១៩ ខែកញ្ញា) បានលើកឡើងថា ប្រទេសជាច្រើន ក្នុងចំណោមប្រទេស ដែលបង្កកង្វក់បំផុត កំពុងបរាជ័យក្នុងការកាត់បន្ថយនូវការបញ្ចេញកាបូនពីវិស័យថាមពលរបស់ពួកគេឲ្យបានលឿនគ្រប់គ្រាន់ ដើម្បីសម្រេចបាននូវគោលដៅនៃការកំណត់ការឡើងកម្ដៅផែនដីមកត្រឹម ១,៥អង្សាសេ។

របាយការណ៍នេះកើតឡើងប៉ុន្មានថ្ងៃបន្ទាប់ពីអង្គការសហប្រជាជាតិ (UN) បានឲ្យដឹងថា ពិភពលោកកំពុងប្រឈមមុខនឹងបម្រែបម្រួលអាកាសធាតុដ៏មហន្តរាយ ហើយនៅឆ្ងាយដ៏គួរឲ្យបារម្ភពីការសម្រេចបាននូវគោលដៅ ក្នុងការកាត់បន្ថយការបង្កកង្វក់កាបូន។

ការកាត់បន្ថយនូវការបំភាយឧស្ម័នផ្ទះកញ្ចក់ពីវិស័យផលិតថាមពល ដែលបង្កកង្វក់ខ្លាំង គឺមានសារៈសំខាន់ ដើម្បីសម្រេចបាននូវគោលដៅនៃកិច្ចព្រមព្រៀងទីក្រុងប៉ារីសឆ្នាំ២០១៥។ នៅក្រោមកិច្ចព្រមព្រៀងនោះ បណ្ដាប្រទេសនានាបានព្រមព្រៀងគ្នា ក្នុងការប្រឹងប្រែងទប់ស្កាត់សីតុណ្ហភាពរបស់ផែនដីមិនឲ្យឡើងខ្ពស់ត្រឹម ១.៥អង្សាសេ លើសពីកម្រិត នៅពាក់កណ្តាលសតវត្សរ៍ទី១៩។

ការជជែកដេញដោលគ្នាយ៉ាងស្វិតស្វាញអំពីរបៀបដកខ្លួនចេញពីការបង្កើតថាមពល ដោយការដុតឥន្ធនៈហ្វូស៊ីល ទំនងជានឹងឈានទៅដល់ដំណាក់សំខាន់នៃកិច្ចពិភាក្សាស្តីពីអាកាសធាតុរបស់អង្គការសហប្រជាជាតិ ដែលចាប់ផ្តើមនៅទីក្រុងឌុយបៃ ក្នុងខែវិច្ឆិកា។ ការភិភាក្សារត្រូវបានគេមើលឃើញថា មានសារៈសំខាន់បំផុត គិតចាប់តាំងពីមានកិច្ចព្រមព្រៀងក្រុងប៉ារីសមក។

តែយ៉ាងណាក្ដី គ្មានប្រទេស ឬប្លុកណាមួយ ដែលត្រូវបានវាយតម្លៃ កំពុងធ្វើដំណើរយ៉ាងពេញលេញ ដើម្បីបំពេញគោលដៅនេះទេ ដោយប្រទេស ឬប្លុកទាំងនោះ មានដូចជាប្រទេសអូស្ត្រាលី ប្រេស៊ីល អង់គ្លេស ឈីលី ចិន សហភាពអឺរ៉ុប អាល្លឺម៉ង់ ឥណ្ឌា ឥណ្ឌូនេស៊ី ជប៉ុន ម៉ិកស៊ិក ម៉ារ៉ុក ទួរគី អាហ្រ្វិកខាងត្បូង អារ៉ាប់រួម និងសហរដ្ឋអាមេរិក៕